ስሙር ኣረኣእያን ውዳበን ንዘላቒ ለውጢ 2-3

ኣብ ውሽጢ ሰራዊት ኣብ ሞንጐ ይከኣሎን ዋርሳይን ዝነበረ ህግደፍ ዝፈጠሮ ናይ ልዕለ ትሕትነት ኣፈላላያት ይቕህም ኣሎ፡፡ ሰራዊት ብፍላይ ካብ እዚ ክ/ሰራዊት ንታሕቲ ናይ ኣዛዝን ተኣዛዚን ናይ ጊላን ጎይታን ዓይነት ኣካይዳታትን ስምዒታትን ብምህሳስ ህዝብና ናይ ምውሓስ ኣብ ዝብል ሓበራዊ ኣረኣእያ ይዓኩኽ ኣሎ፡፡

ብጀካ’ቶም ጥብቆ ኢሳያስ ኮይኖም ምእንተ ውልቃዊ ረብሐኦምን ረብሓ ኣያኦምን ዝሕንግዱ ወይ ቀራና መገዲ ዝወላወሉ ውሕዳት ካብ ኣዘዝቲ ግንባራትን ካብኡ ንላዕልን ኣብ ሰራዊት፡ ኣብ ዝተፈላለዩ ክፍልታትን ዝርከቡ እቶም ዝበዝሑ ኮሎኔላትን ካብኡ ንታሕቲ መዓርግ ዘለዎም መኮነናትን ኣብ ጸግዒ እቲ ተራ ወተሃደርን ህዝብን ብምዃን ብቕሉዕን ዘይቅሉዕን ኣግባባት ንኢሳያስን ደገፍቱን ምንሓፍ ይጅመር ኣሎ፡፡

ካብ መጀመሪያ ስሙን ወርሒ ጥቅምቲ ክሳብ ሕጂ ዘይተኣልየን ንቓልዕ ከይወጽእ ዓቢ ጥንቃቐ ይገበረሉ ተባሂሉ ዝተኣዘዘን ኣብ ሞንጎ ላዕለዎትን ታሕተዎትን ወትሃደራዊ መኮነናት ዝተፈጥረ ምጉርፋጥ ኣሎ፡፡

ብዛዕባ’ዚ ምጉርፋጥ ዝምልከት ዝርዝራት፡ መጀመሪያ ኣዘዝቲ ክፍላተ ሰራዊትን ካብኡ ንላዕሊ ኣዘዝቲ ግንባራትን ዝርከብዎ ኣኼባ ብጀነራል ሰብሓት ኣብ ኣስመራ ተኻይዱ፡፡ ዕላማ’ቲ ኣኼባ ብሓፈሻ ዳግመ ውደባን ምደባን ኣብ ዝብል ናይ መንግስቲ መደባት መሰረት ኣንጺፉ ብፍላይ ድማ እዚ ሃገራዊ መደብ ናብ ሚኒስትሪ ምክልኻል ክሽረፍ ከሎ ምጭፍላቕ ኣሃዱታትን ምኽንያቱን፡ ምውዛዕ ሓለፍቲ ሰራዊትን ኣፈጻጽማታቱን ማእከል ገይሩ ንዘተ ቀሪቡ፡፡ ኣብ’ቲ ዝቐረበ ኣጀንዳ ኣዘዝቲ ክፍላተ ሰራዊት ብድፍረት ዘቕረብዎ ርእይቶታት ምትዕርራይ ኣሃዱታት ይኹን ምደባ ሓለፍቲ ዝብል መደብ ቅድሚ ምፍጻሙ መሰረታዊ ሕቶታት ሰራዊትን ህዝብን መፍትሒ ክረክብ እንተዘይተገይሩ እዚ መደብ ንምፍጻሙ ከምዝኸብድ ሕቶታት ምልዓሎም ወረታት ተናፊሱ፡፡

ኣብ’ዚ ክትዕ ብወገን በዓል ወዲ ኢፍሬም ዝቐረበ ሓሳባት መሰረታዊ ሕቶታት ሰራዊትን ህዝብን ምህላው ከምዘይከሓድ እንተኣመንሉ እኳ ኣብዚ እዋን ንምምላሱ ግን መንግስቲ ዓቕሚ ከምዘይብሉ ገለጹ፡፡ ካብ ሽይጣት ወርቂ መዓድን ቢሻን ኣብ ወጻእ ካብ ዝነብሩ ወለንተኛታት ዝለኣኻ 2% ባጤራ ወጻኢ ሸርፊ፡ ኣብ ምዕዳግ ነፈርቲ መጓዓዝያ፡ ናይ ህንጻ ማሽነሪታት፡ ድጐማ ቀረብ ጸዓት፡ 50 ሜጋ ዋት ዘምንጩ ጀነሬተር፡ በቢወርሑ ካብ ሱዳን ንዝኣቱ ቀለብ ሰራዊትን ህዝብን ወዘተ…ይውዕል ብምህላው ኣብ ቀረባ እዋን መነባብሮ ሰራዊት ንምልዋጥ ከምዘይከኣል ብግልጺ ቀሪቡ፡፡ በዚ ናይ ጀነራልን የማነ ህበይን ሞጐት ተሳዒሮምን ኣሚኖም ዝወጹ ላዕለዎት ኣዘዝቲ ሰራዊት ናብ መእዘዚ ቦትኦም ምስተመልሱ ንሓለቓ ስታፋት ክፍላተ ሰራዊት ኩሎም  ካብን ናብን ወዚዖሞም፡፡

ይቕጽል……

ካብ ኮሎኔል

2^ይ ክፋል

November 2013

ድሕሪ ኣኼባ ኣዘዝቲ ክፍላተ ሰራዊትን ግንባራትን ዝሰዓበ ኣኼባ ኣዘዝቲ ብርጌዳት በብግንባሩ እዩ፡፡

ምዕራባዊ ግንባር ኣብ ባረንቱ፡ ምብራቓዊ ግንባር ዓሰብ፡ ማእከላይ ግንባር ኣብ ዓላ ተኻይዱ፡፡ኣኼባ ኣዘዝቲ በራጊድ ማእከላይ ግንባር መራሒኡ ብ/ጀነራል ርእሲ ምራኽ እዩ ነይሩ፡፡

ርእሲ ምራኽ ግን መን’ዩ? ንዘይትፈልጥዎ ኣሕጺረ ከላልየኩም፡፡ ብርጋዴር ጀነራል ስምኦን ዕቑበ (ርእሲ ምራኽ) ኩነታት ድሕሪ ባይትኡ ንምፍታሽ ንድሕሪት ኣርሒቐ  ከይተመለስኩ ካብ 2008 -2010 ኣዛዚ ክ/ሰራዊት 38 ኮይኑ መእዘዚ ማእከሉ ኣብ ከተማ ባጽዕ ብምግባር ካብ ካልኣይ ቤተ መንግስቲ ኣቶ ኢሳያስ ኣፈወርቂ ባጽዕ ቀጥታ ትእዛዝ እንዳተቐበለ ንነጻ ንግድ ዞባ (Free Zone)  ብዝብል ምኽንያት ኣብ ልዕሊ ነበርቲ ከተማ ባጽዕ ምስ ወ/ሮ ፋና ብሓባር ርእሲ ኣድጊን ርእሲ ምራኽን ብዝብል ሷጓ ዝፍለጡ ክልተ ሰባት ንጥፍኣት ሰሚሮም ህዝቢ እቲ ከባቢ ከምዘከላበትዎ ይፍለጥ፡፡

ርእሲ ምራኽ ኣብ ልዕሊ እዚ ሕንከት ዘይብሉ ጸረ ህዝቢ ተግባሩ ምስ ፕረዚዳንት ብዝነበሮ ቅርርብን ስልጣኑ ተጠቒሙን ሃብቲ ሃገርን ህዝብን ናብ ውልቃዊ ረብሓታቱ ብምውዓል ኣብ ዱባሩባ በዓል ደብርታት ገዛ ብምህናጽ ኣብ ብልሽውና ካብ ዝተቖማጥዑ ሓለፍቲ ሓደ’ዩ፡፡ በዚ ከይኣክል ግን ነጻ ጉልበት ኣባላት ሰራዊት ንምጥቃም ካብ ባጽዕ ናብ ዱባሩባ ብመኪና መንግስቲ ጺዒኑ ኣብ ህንጽኡ ክሰርሑ የጓዕዞም ዝነበረ ኣባላት ሰራዊት እታ መኪና ተገልቢጣቶም ክሃልቁ ዝገበረ ካብ ሕልና ኤርትራውያን ዘይፈሓቕ ገብን ዝፈጸመ ሰብ እዩ፡፡

ብብልሽውና (ስርቂ) ተጠርጢሩ ኣብ ሻባይ መንደር ኣፍዓበት ንዝተወሰነ ግዜ ተሓይሩ  እኳ እንተነበረ ባዕሉ ኣቶ ኢሳያስ  ናብቲ ቦታ ብምኻድ ካብ ማሕዩር ኣውጺኡ ኣብ ገዝኡ ኮፍ ክብልን ሓድሓደ ናይ ውልቁ ሕርሻታት ኣብ ዓሊ ጊደር ከነጣጠፍን ምስ ኣማሓዳሪ ዓንሰባ ሸኽ ዛይድ ከምዘተኣሳሰሮ ይፍለጥ፡፡ ፍታሕ ፕረዚዳንት ኢሳያስ ኣብ ልዕሊ ርእሲ ምራኽ ነቲ ዝሰረቕካዮ ገንዘብ ሃገር ግዲ የብልካን ኣብ ውልቃዊ ሕርሻኻ ኣውዕሎ ዝብል ፍቓድን ምኽርን ብምሃብ እዩ ኣፋኒይዎ ነይሩ፡፡

ይኹን’ምበር ሕጂ’ውን ሚስተር ፕረዚዳንት ካብ ውልቃዊ ፕሮጀክት ሕርሻኡ ኣውጺኡ  ዘይተገመተ ስልጣን ኣሸከሞ፡፡  እቲ ስልጣን ብ/ጀነራል ሓሊባይ ናብ ቤ/ጽ ፕረዚዳንት ምስተስሓበ ንቦታ ሓሊባይ ተኪኡ ሓለቓ ስታፍ ዑመር ጠዊል ኮይኑ ንማእከላይ ግንባር ክመርሕ ለኣኾ፡፡

ምደባ ርእሲ ምራኽ ማንም ሰብ (ሓላፊ ይኹን ተሓላፊ) ዘይገመቶ ወደቓ’ዩ ዝነበረ፡፡ ዳርጋ ብመብዛሕትና ተጋደልቲ ህዝባዊ ግንባር ዝእመነሉ ብዕድመ ገድሉን ተሞኩሩኡን ካብ ርእሲ ምራኽ ዝለዓለን ዝበለጸን ሲነር ኣዛዚ ክ/ሰራዊት 19 ብ/ጀነራል ጸሃየ ካሕሳይ (ሂላል) ኣብ ማእከላይ ግንባር እንዳሃለወ፡ ነቲ ብስርቅን ብግዕዙይ ተግባራቱን ዝተጠላቐየ ርእሲ ምራኽ ኣብ ክንዲ ብገበን ምቕጻዕ ልዕሊ ዓቕሙ ስልጣን ተዓዲልዎ ደረጃ ወሲኹ ኣብ ልዕሊ ሂላል ክምደብ ፍጹም ኣይተገመትን፡፡ ግን  ንሃብሮማይ ኢሳያስ ዘይከኣሎ እንታይ ኣሎ ሰብ ክሳብ መዓልቱ ኣድሊይዎ ሰማይ ይሰቕሎ፡ ኣየድለዮን ከኣ የወግዶ፡፡ በየናይ ሕጊ ይቕየድ? መን ከ ያዕ ክብሎ? ፡፡ ስለዚ ርእሲ ምራኽ ሎሚ ሓለቓ ስታፍ ጥራይ ዘይኮነ ድሕሪ ምሕያር ኣቦይ ገብረማርያም (ጠዊል) ኣዛዚ ግንባር ኮይኑ ማእከላይ ግንባር ካብ ዝመርሕ ነዊሕ ገይሩ ኣሎ፡፡

…….ይቕጽል  

ካብ ኮሎኔል

3^ይ ክፋል

November 2013