ንህግደፍ ኣለና ምሳኹም ንደለይቲ ፍትሒ ኣጆኹም

ኣብ መሰልን ፍትሕን ዘለዎ ሃገር

ክትፈርሑዎ ነዚ ስርዓተ ዱሑር

ሊቀ መምበር ብሓሶት ዘዳናግር

20 ዓመት መብጽዓ ንዘይትግበር

ኣይትእመኑዎም ንገጅለ ፈገራግር

ስረኻ ዕጠቆ ጎበዝ ኤሪትራዊ

ክሳብ ምዓስ ተሓቢእካ ከተኢዊ

ከም ጓና ኣይትኹን ከም ባዕዳዊ

ይኣክል ፍርሒ ኣይትኹን ጀጃዊ

ሓዲኡ ምረጽ ከይትበሃል ኣዕናዊ

ንጠፍ ተሓባበር ምስ ተቓለስቲ

ዝዕዘቡ በዚሖም ሕቡኣን ፈለስቲ

ንድኽመቶም ክሽፍኑ ኣመኽነይቲ

ውድባት ኣይሰርሓን ኣለዋ በሃልቲ

ስዓቢ ተረኸቡ ከምኣቶም ሃደምቲ

ብህግደፍ ሪዒዶም ደሞም ተመጽዩ

መሰኪን የሕዝኑኻ እናበኸዩ ዝፋጽዩ

ክስዕስዑ ደም እናጠዓሞም ዝቋጻጸዩ

ከይብሉኒ ክብሉ ሓንጎሎም ዝተሃስዩ

ምስ ዝተጠላቓዩ ብህዝቦም ዝዋዘዩ

ሰሪሐን ኣይ ሰሪሐን ታይገደሶም

ከይተዋስኡ ክዋራዘዩ መሕነኾም

ሰባት ዘቃልሉ ኣብ ክንደይ ንሶም

ኣብ ውሻጠ ዝሕብኡ ኣመኽንዮም

ንዱኹማ ፍጥረት ዋጋይትሃብዎም

ካብዚኦምሲ ደገፍቲ ህግደፍ ይሕሹ

ዝኣመንሉ ሓቂ መሲሉዎም ዝቃለሱ

ክሳብ ዝነቕሑ ናብ ነብሶም ዝምለሱ

ንሕና ናትካ ንስኻ ናትና ናሉዝውድሱ

ህግደፍ ክሳብ ዝጠፍእ ክሳብ ዝፍደሱ

ሰብ ማዕዶኸ እንታዩ ኣበርክቶኹም

ብዘይካ ሕሜታ ሕሹኽ ተሓቢእኩም

ኣናብስ ውሻጠ ኣናብር ገደና ዲኹም?

ኣበይና ዘለናልኩም ፈትሹ ነብስኹም

ምረት ህዘብኹም ጎሊሑ ክረአየኩም

ካብ ፍርሒ ክትላቐቑ ጀጋኑ ክትኮኑ

ምስ ህዝብኹም ደው በሉ ኣብ ጎኑ

ብሕልና ተበገሱ ራህርሁ ኣይትጨክኑ

ክፉእ ናረኹም ክሳድኩም ኣይተድነኑ

ጸኒታያ ሃገር ብህዝብኹም ከይትኹነኑ

ይኣክል ብህዝብን ብሃገርን ምጽዋት

ጸወታ ይጽናሓልና ክሳብ ግዜ ዓወት

ነድሕኖ ብሓባር ዝጸንት ዘሎ ህይወት

ብእዋኑ ህግደፍ ከይወሓጣ ዛመሬት

ከይትኸውን ኤርትራ ከምዘይ ነበረት

ኤረና ኩሑሎ ሎም ዘመን ሓዲኡሎ

ተስፋማርያም ወ/ጊዮርጊስ

09/08/2013 Norway