መሕወዪ ግብሪ!’

ኣታ ሓወይ! ቅንጥው እስከ’ብላ ስጋኻ

ክተረጋግጽ ብሓቂ እንተሊኻ

‘ኣለኹ፡! እንተልካኸ ምሰየንኖት ኢኻ

ምስ ዕሱባት!

ምስ ዝኑባት!

ምስቶም ፈሊጥና ብሃልቲ ሃላያት?

ምስቶም ሽሙ ዘዓሽዎም ግጉያት?

ፈውሲ ሕንከት ዝተለኽዩ ዕንዝርያታት?

‘ንሕና ንሱ፡ ንሱ ንሕና!

ኢሎም ኣብ ዓለም ኣደባባይ፡ ዝጭድሩ ዕሹራት?

ምስትም ‘ጽቡቕ ኣሎ ህዝቢ!’ እናበሉ ዘደናግሩ ንግሩሃት?

ንህዝቦም ከድሕኑ ዝቃለሱ ዝዕንቅፉ ነውራማት!

ንህዝቦም ከጥፍኡ እምኒ ዘቐብሉ ግርጉራት?

ንህግደፍ ዝሕግዙ ኣብ ልዕሊ ህዝቢ ክፍጽም ገበናት?

ወይ ምስ’ዞም ገንዘብ ምምንጣል ዝለመዱ ብዕሊ

‘መሕወዪ ግብሪ!’ እናበሉ ገንዘብ ዝእክቡ ንህዝቢ መቑሰሊ!

ነዚ ብዘይ ኣፈርክቡ፡ ብዘይ ኣውያት፡ ንወዲ ሃገር ዝኸድን ጸብሪ

ኣታ! ነዚ ‘መሕወዪግብሪ!’ ዝተባህለ መጨደሪ

ህግደፍ ህዝቢ ንምጽናት ዝጥቀመሉ ምዃኑ ዘረድእ ዶ ተሳኢኑ መርማሪ

ካብ ውንጅር ዓለቕቲ ዘድሕን ሓባሪ

ክሳብ መኣስ’ዩ ነዚ ሓላል ህዝቢ!

ተኸዊሉዎ ዝነብር’ቲ ጽሩይ ማይ ዝዛሪ

ከይትህሉ ድኣ ምስቶም ፍርሂ ዝገዝኦም ዕኑዳት!

መዓልቲ ፍርዲ ትቀላቐል ከም ዘላ ዘይተረድኦም ብሃማት

ስ-ለ-ዚ! ተመራመር፡ ልብኻ ብዓለባ ሳሬት ዝሸፈንካ ሕውየት!

ፈንጢስካ ውጻእ ካብዚ ዓንኬል ህግደፍ መቕዘፍት

ግዜ ከለካ ጽሩይ ማይ ስተ፡ ነው በሎ ሓሬት

ሎሚ’ያ ምስ ህዝብኻ ምስላፍ ምርካብ ስርየት

ሓቦ በል! ተለዓል! ግ-ል-ህ ኣብሎ’ቲ ዓለባ ሳሬት!

ብዕውርካ ከይወግሕካ መሬት!

ብዕውርካ ከይወግሕካ መሬት!

ምልኪ ይፍረስ ሕጊ ይንገስ

ምስሉ ተኪኤ