ኤርትራውያን ካናዳውያን ጉዳይ ናይቶም 400 ኣብ ማእከላይ ባሕሪ ዝሃለቑ መንእሰያት ክጻረ ሰላማዊ ሰልፊ ኣካይዶም

ኤርትራውያን ካናዳውያን ተቐማጦ ቶረንቶን ከባቢኣን ሎሚ መዓልቲ ኣብ ኣፍደገ ቤት ጽሕፈት ባይቶ ኦንታርዮ ብምስላፍ፡ ጉዳይ ናይቶም ብ22 መጋቢት ካብ ሊብያ ናብ ኤውሮጳ ንምስጋር ኣብ ማእከላይ ባሕሪ ዝጠሓሉ 400 ኤርትራውያን ክጽናዕ ጻውዒት ኣቕሪቦም።

እዞም ጉዳሳት ኤርትራውያን በቲ ዘጋጠመ ዘሕዝን ፍጻመ ተቖጢዖም፡ ጠንቂ ናይዚ ኩሉ ሓደጋ ህልቂት መንእሰያትና ዝኸውን ዘሎ ስርዓት ህግደፍ ዕድሚኡ ክሓጽር ሓደ ጭርሖ ድሕሪ’ቲ ሓደ ከንጎድጉድዎ ኣርፊዶም። ‘ፍትሒ ኣብ ሃገርና ይንገስ!’ ‘ውድቀት ንስርዓት ኢሳያስ!’ ‘ህዝብና በዚ ኣይንብርከኽን’ዩ፡ ኣደታትና ኣይነብዓን’የን!’ ‘ዝሓበረ ህዝቢ ዝስዕሮ የብሉን፡ ንሕበር!’ ወዘተ ዝብል ጭርሖታት ብሓደ እናድመጹ ኣቓልቦ ፖለቲከኛታትን በጻሕቲን ከምዝረክብ ጌሮም።

ወከልቲ ናይቲ ሰላማዊ ሰልፊ ምስ ኣባል ባይቶ ሊበራልን ሚኒስተር ኢሚግረሽን ኦንታርዮን ዶ/ር ኢሪክ ሆስኪንስ ብምርኻብ ምኽንያት ናይቲ ሰላማዊ ሰልፊን ህሉው ኩነታት ሃገርን ሓጺር መብርሂ ሂቦሞ። ኣስታት 400 ኤርትራውያን ዜጋታት ኣብ ማእከላይ ባሕሪ ከምዝጠሓሉ፣ ገለ ካብኦም ብጥይት ዝተሃርሙ ከምዝነበሩ፣ ኣማውታ ናይቶም ኤርትራውያን ስደተኛታት ኣጋጣሚ ጥራሕ ክኸውን ከምዘይክእል ወዘተ ዝርዝራዊ ሓበሬታ ብምቕራብ፡ መንግስቲ ካናዳ ነዚ ንምጽራይ ዝከኣሎ ክገብር ጻውዒት ኣቕሪበምሉ። ዶ/ር ሆስኪንስ ንኩሉ ብጽሞና ድሕሪ ምስማዕ፡ ነዚ ዘሐዝን ፍጻመ ኣቓልቦ ንክረክብ ዝከኣሎ ክገብር ምዃኑ ቃል ኣትዩ። ብድሕሪ’ዚ ናብቶም ሰልፈኛታት ብምቕራብ “ወጽዓኹምን ጻውዒትኩምን ብልክዕ ሰሚዐዮ ኣለኹ፡ ዝከኣለኒ ከኣ ክገብር’የ፡” ኢሉ። ዶ/ር ሆስኪን መደርኡ ብምቕጻል፡ ‘ክንዲ ናትኩም’ኳ እንተዘይኮነ ካብ ዝኾነ ካልእ ካናዳዊ ንላዕሊ ብዛዕባ ኤርትራ ድሓን ዝኾነ ኣፍልጦ ኣለኒ። ኣብ ኤርትራ ከም ሓኪም ኮይነ ክሰርሕ ዕድል ረኺበ ኔረ’የ። ናይ ብሓቂ ሰላምን ቅሳነትን ዝግብኦ ህዝቢ’ዩ፡” ኢሉ።
 
እዚ ካብ ሰዓት 10 ናይ ንግሆ ክሳብ ሰዓት 12 ዝቐጸለ ቅልጡፍ ቆላሕታ ዝረኸበ ሰልፊ፡ ንኩነታት ወጽዓ ህዝቢ ኤርትራ ዘይፈልጡ ካናዳውያን ዜጋታት መንቋሕቋሕታ ዝፈጠረ ኔሩ። ንኩሎም ኣባላት ባይቶ ኣብ ክልተ ገጽ ዝሰፈረ ንህሉው ኩነታት ሃገርና ዝገልጽ ጽሑፍ ኣብ ቤት-ጽሕፈታቶም ከምዝበጽሖም ተጌሩ።

ኣብ መወዳእታ ሰልፈኛታት፡ ንስውኣት፡ ነቶም ኣብ ባሕሪ ዝሃለቑ መንእሰያትን ካልኦት ግዳያት ገፋዒ ስርዓት ህግደፍ ዝኾኑ ዜጋታትን ንምዝካር ናይ ሓደ ደቒቕ ዝኽረ-ሰማእታት ኣካይዶም። ንቕሓት ህዝቢ ካናዳ ዝያዳ ንምዕባይ ድማ ጎስጓሳቶም ቀጻሊ ክኸውን ሕልንኦም ስሒሎም ናይቲ መዓልቲ ሰላማዊ ሰልፊ ብሰላም ዛዚሞም።

ኣሮን ብርሃነ
ቶረንቶ