ማሕበር ኣካለ-ጽጉማን ጨንፈር ሰሜን ኣሜሪካ

ታሪኻዊ ናይ ኤርትራ ማሕበር ኣካለ-ጽጉማን ጨንፈር ሰሜን ኣሜሪካ፡ ሓምለ 3 2010 ኣብ ከተማ ሺካጎ ሕቡራት ሃገራት ኣሜሪካ፡ ብዕሊ ተመስሪቱ። ቅድም ኢሉ፡ ኣሳናዳኢት ሽማግለ ንምስንዳእ መስራቲ ጉባኤ ንምቛም ናይ ኤርትራ ማሕበር ኣካለ-ጽጉማን ጨንፈር ሰሜን ኣሜሪካ ንምቅናዕ ኣብ ምንቅስቓስ ጸኒሓ።  ኣሳናዳኢት ሽማግለ፡ ማሕበር ዝምራሓሉ ውሽጣዊ ሕጊ፡ ፖሊሲ፡  ቅርጻ ኣመራርሓ  ነዲፋ ናብ ጉባኤ ኣቕሪባ። ጉባኤኛ፡ ንዝቐረበሉ ንድፊ ዘትያ፡ ዘድሊ ምምሕያሻት ድሕሪ ምግባር ውሳኔታት ኣጽዲቑ። ጉባኤ፡ ንክልተ ዓመት፡ ማሕበር ንዝመርሕ ቦርድ መዚዙ።

ጉባኤ፡ ብተሳትፎ ናይ ኤርትራ ማሕበር ኣካለ-ጽጉማን ዋና-ጸሓፊ ተስፋይ ተኽለዝጊ ካብ ሃገር ፈረንሳ፡ ብምክትል ዋና-ጸሓፊ ኣፈወርቂ ኣባይ ካብ ሃገር ጀርመን፡ ብናይ ነዊሕ ዓመታት ኣብ ምምራሕ መደበር ውጉኣት ሓርነት ዓቢ ግደ ዘበርከተ መዓሾ ኣስራት ካብ ሃገር ጀርመን፡ ብካብ ትሻዓተ ስተይትስ ናይ ሕቡራት ሃገራት ኣሜሪካ፡ ብካብ ሃገር ካናዳ፡ ዝመጹ ጉባኤኛታት ኣዝዩ ድሚቑ ውዒሉ።

ጉባኤ ናይ ኤርትራ ማሕበር ኣካለ-ጽጉማን ጨንፈር ሰሜን ኣሜሪካ፡ ብዕላምኡ ይኹን ብተልእኽኡ ታሪኻዊ ዕዘት ኣለዎ። እዚ ንኣካለ-ጽጉማን ኣሕዋትን ኣሓትን ዝቖመ ዘይመኽሰባዊ ማሕበር’ዚ፡ ኣብ መስራቲ ጉባኤኡ፡ ከም

1. ካብ ኩሉ ፖለቲካዊ ንጥፈታት ጽልዋታትን ናጻ ኮይኑ ይንቀሳቐስ
2. ብመትከል፡ ካብ ብብሄራዊ፡ ብሃይማኖታዊ፡ ብፖለቲካዊ እምንቶታት፣ ብጾታዊ፡ ፍልልያትን፡ ጸጊዕነትን ከምኡ’ውን ካብ ካልእ ናይ ኣድልዎን ሻራነትን ዝምባሌታት ናጻ ኮይኑ ክነጥፍ
3. ንኩሎም ኣብ ዕላማን መትከላትን ናይ ኤርትራ ማሕበር ኣካለ-ጽጉማን ጨንፈር ሰሜን ኣሜሪካ ዝኣምኑ ክፉት ክኸውን
4. ማሕበር፡ ንኣባላቱ፡ ንዕላማን ተልእኾን ናይ ማሕበር ተረዲኦም ዘድሊ ወፈያታት ንዘበርክቱ ኣካላትን ውልቀ-ሰባትን፡ ተሓታትነትን ግሉጽነትን ፖሊሲ ከዘውትር ይህልዋ
5. ፈጻሚት ኣካል፡ ኣብ ውሽጢ ሽዱሽተ ወርሒ፡ መጽናዕትን ዝምድናን ዘካይድ(ዱ) ሽማግለ/ኣካል ናብ ሱዳን- ክትልእኽ ወዘተ… ዝኣመሰሉ ውሳኔታት ከጽድቕ ክኢሉ።

ጉባኤ፡

• ንናይ ኤርትራ ማሕበር ኣካለ-ጽጉማን፡ በብጊዜኡ- ዘድልዮም ምሕደራዊ፡ ገንዘባዊ፡ ማሕበራውን ሞራላውን ሓላፍነት ወሲዶም ክፍጽሙ ንዝጸንሑን ዘለዉን ኣካላትን ውልቀ-ሰባትን፡
• ንጸገማት ኣካለ-ጽጉማን ኤርትራ ናብ ህዝቢ ኣብ ምቅላሕ ግደታት ንዝፈጸሙ ናይ መራኸቢ ብዙሓን ትካላት ዘርዚሩ፡ ዕዙዝ ምስጋና ኣቕሪብሎም።

ንምሸቱ፡ ብወናማት ሙዚቃኛታት፡ ኣስመላሽ ክፍለማርያም- ውጉእ ሓርነት፡ ኣሮን ነጋሲ፡ ፋሲል መኮነንን፡ ቢንያም ካሕሳይን ተሰንዩን ደሚቑን፡ ንታሪኻዊ ምስረታ ማሕበር ዘንጸባርቕ ወንታት እናገንፈለ ክሳብ ሰዓት 2፡00 ወጋሕታ ቀጺሉ።

ዓወት ንኣሳልጦታት ዕማማት ማሕበር
ዘልኣለማዊ ክብሪ ንስውኣትና