ናጽነት ብዘይ ፍትሒ ትርጉም ኣልቦ ኢዩ!

ብ18ን 19ን መስከረም 2001፡ ሚኒስተራትን ጀነራላትን ዝርከቡዎም፡ ኣባላት ማእከላይን ሃገራውን ባይቶ ዝነበሩ፡ ገዳይምን ህቡባትን ተጋደልቲ (G15)፡ ፕረዚደንት ብሕጊ ኪቕየድ፡ ቅዋም ኪትግበር፡ ስልጣን ናብ ህዝቢ ኪርከብ፡ ናጻ ፖለቲካውያን ማሕበራትን ሰልፍታትን ኪቆማ፡ ፍሉይ ቤት ፍርዲ ኪፈርስ፡ ሃገራዊ ገምጋም ስራሕ ኪግበር፡ ብምሕታት ናብ ህዝብን ተጋደልትን ቅሉዕ ደብዳቤ ዝጸሓፉ መራሕቲ፡ ብንግሁኡ ተሃዲኖም ተወሲዶም ደሃዮም ጠፍአ።

እተን በብቑሩብ ኪዕምብባን፡ ብዓቕመን ልሳን ህዝብን ሓበሬታን ኪኾናን ጀሚረን ዝነበራ፡ ናይ ብሕቲ ጋዜጣታትን መጽሔታትን፡ ኣብ መንጎ ፕረዚደንትን ደለይቲ ለውጥን ዝተፈጥረ ዘይምርድዳእ ስለ ዘቃላሓ፡ ርእይቶን ሓሳብን ነቶም ነቲ ቓልስን መንግስትን ንዓመታት ዝመርሑዎ ጀጋኑ ኣብ ዓምድታተን ስለዘስፈራ፡ ብጠቕላላኡ፡ ንኹሉ መንግስቲ ዝህቦ ዝነበረ ናይ ጸለመን ጠቐነን ፕሮፖጋንዳ ስለዘቃላዓ፡ ምስ ኣዳለውተን ኣብ መዓሙቕ ተደርበያ።

ካብኡ ቀጺሉ ዝተፈላለየ ማእከላይ ሓላፍነት ዝነበሮም ተደናገጽቲ G15 ኢኹም ብማለት ብኣማኢት ዝቁጸሩ ሰባት ኣደዳ ማእሰርትን ስቓይን ክኾኑ ጀመሩ። ብዙሓት ንጹሃት ኣመንትን መራሕትን ዝተፈላለያ ሃይማኖታት፡ ኣብ ትሕቲ ፈጣሪ ብምውካሎምን ቅዱስ ቃል ብምስባኾምንውን ኣደዳ ግፍዒ ኮኑ።

ህዝቢ ኤርትራ ንልዕሊ ሰላሳ ዓመታት ዝደመየሉ ምኽንያት፡ ዜጋታቱ ኣብ ቅድሚ ሕጊ ብዘይ ኣፈላላይን ኣድልዎን ኪጓሰዩ፣ ናይ ድምጽን ምርጫን ዲሞክራሲያዊ መሰሎም ኪኽበር፣ ናይ ሃይማኖትን እምነትን፣ ናይ ምጽሓፍን ምዝራብን መሰሎም ኪሕለወሎም፣ ብሓጺሩ ኣብታ ንኽትህሉን ንኽትድሕንን ክቡር ዋጋ ዝኸፈሉላ፡ ናትና ዝብሉዋ ሃገር ብናጽነትን ሓርነትን ኪነብሩ ስለ ዝደለየ ኢዩ።

ኣብ ዝተፈላለየ ጽሑፋት ተደጋጊሙ ይግለጽ ከምዘሎ፡ ሎሚ ኤርትራ፡ ሰብኣዊ መሰላት ደቂ ሰብ ዝርገጸላ፡ ዜጋታታ ብዘይ ሕጋዊ መስርሕ ፍርዲ ንዓመታት ዝዳጎኑላ፡ ዝጭወዩላ፡ ዝሓቑላ በስገዳድ ዝዕስከሩላ፡ መንእሰያታ ብጃምላ ዝስደዱላን፡ ኣብ ቀላያት ማእከላይ ባሕሪ ዝጠፍኡላን፡ ድምጺ ህዝቢ ዝዕበሰላ፡ ርእይቶኻን ሓሳብካን ዘይትገልጸላ፡ ሃገር ብምልእታ ናብ ቤት ማሕቡስ ተቐይራ ኣላ።

እንሆ ድሕሪ ናይ 8 ዓመት ማእሰርቲ፡ ማዕከናት ዜና ገሊኦም ካብቶም ብ2001 ዝተኣስሩ መራሕትን ጋዜጠኛታትን ከምዝሞቱ ይሕብራ ኣለዋ። ስርዓት ህግደፍ ግን ካብቲ ዘለዎ ንዕቀት ህዝቢ ተበጊሱ ዋላሓንቲ መግለጺ ኣይሃበን። ኤርትራውያን ንሰብኣውን ደሞክራስያውን መሰላት - ዓባይ ብሪጣንያ በዚ ናይ 8ይ ዓመት መዘከርታ ብምግባር ሃለዋት ኩሎም እሱራት ወግዓዊ መግለጺ ክወሃብን፡ እቶም ብህይወቶም ዘለዉ ድማ ብዘይ ወዓል ሕደር ክፍትሑን ትጽውዕ።

ዘልኣለማዊ ዝኽሪ ንስውኣትና

18 መስከረም 2009
ኤርትራውያን ንሰብኣውን ደሞክራስያውን መሰላት - ዓባይ ብሪጣንያ ።