ይኣኽለና ዘሎ ባርነት

ዘጽነተ ኤርትራዊ መንነት፡

ትዕድልትና ኮይኑ ተዋሪድና

ን20 ዓመት ካብ ዓለም ተፈሊና

እንስሳ ተቖጺርና ሰብ ከለና

ጓኖት ወጽዮም ተረጊጽና በሕዋትና፡

መንእሰይ ጸኒቱ ኤርትራዊ ሕፍረት ተቐኒቱ

ወላዲ ጸምይዎ ኣብ ዕብየቱ ቀባሪ ስኢኑ ኣብ ሙሟቱ፡

ዝኣመናዮም ጠሊሞምና ሕሱም ባርነት ኣግዚሞምና

ናጽነት ኢሎም መከራ ሸሊሞምና

ብዘይ ሕፍረት ሸይሸይ ኢሎሙልና፡

ሕጂ ከኣ.... መንእሰይ ኣብ ምንቃሉ

ስመር ኢሉ ክመልስ መሰሉ

ተላዒሎም ቃልሱ ክዘርግሉ ተሰሚዖም ሓባራዊ ዘተ ክብሉ፡

ወይ ጉ......ድ ንጽጉን ባርነት እዚ ኩሉ ኣውሎ

ተወሳኺ 20 ዓመት ንባርነት ክንዳሎ

ክሉ ደቀይ መንእሰይስ እነይውዕሎ

ባዕሉ'ለዎ እቲ ናቱ ንቕሎ

ክገጥማ'ዩ ንህግደፍ ድሎ ብድሎ

ኢድኩም ኣክቡልና ባዕልና ክንዘሎ፡

ኣደብ ግበሩ ይትረፍ ጽገና ክነተግብሮ ኢና

ወግዓዊ ፍትሕና ሕጊ እንዳባ ክንተክል ኣብ ዓድና፡

እንታይ ጽገንኡ!! እዋይ ክኸፍእ ምስምዑ

ዳግማይ ብህዝቢ ክትጣልዑ ዝተረፉ ህጻውንቲ ክትበልዑ

ካልእ 20 ዓመት ህዝቢ ክተንብዑ፡

ኣይፋልኩምን ግደፉ ግደፉ ቃልሲ መንእሰይ ኣይትኹለፉ፡

ይኣክል ስስዐ ይኣክል ገድላዊ ብድዐ

መን ኣሎ ብኣኹም ዝኾርዐ መን'ከሎ ብኩርማጅኩም ዘይተቐጽዐ

ህዝቢ ክጠሚ ንስኹም ክትበልዑ ልግዐ

መን'ዶ ኣሎ'ዩ ብዘይካኹም ዘኾምስዐ?

ፍትሒ ይንገስ!

 ወልዱ ተኽለ