ስርዓት ኢሳይያስ ኣብ ዊዓ ኣጋጣሙ ንዘሎ ተላባዒ ሕማም ክኽውሎ ፍሹል ፈተነታት ይገብር ኣሎ።

ኣብ ጊንዳዕ ዝርከቡ እሙናት ምንጭታት ማሕበረሰባዊት ሬድዮ ድምጺ ወጋሕታ ከምዘረጋገጹልና- ስርዓት ኢሳይያስ ኣብ ዊዓ ኣጋጢሙ ብዘሎ ተላባዒ ሕማም ንዝተለኸፉ ዜጋታትና ብለይቲ ናብ ሆስፒታል ጊንዳዕ ብምውሳድ ብስቱር ግቡእ ኣገልግሎት ሕክምና ከይረኸቡ ይመልሶም ኣሎ።

ናይዚ ኣውራ ምክንያት እቲ ጠላም ስርዓት ኢሳይያስ ህዝብና ነቲ ኣብ ዊዓ ኣጋጢሙ ዘሎ ከቢድ ሓደጋ ከይፈልጦ ክኽውሎን ክሽፍኖን ስለዝደለየ’ኳ እንተኾነ ህዝብና እኹል ኣፍልጦ ስለዝረኸበ እቲ ተንኮል በርዒኑ ተሪፉ’ሎ።

ኣብ ዊዓ ምስ ብርቱዕ ዋዒ ተዛሚዱ ዋሕዲ ዝስተ ማይ፡ መግብን ኣግልግሎት ሕክምናን ስለዘሎ እቲ ተላባዒ ሕማም ኣዝዩ ዘሰክፍ ሓደጋ ክኸውን ግድን ኮይኑ’ዩ ዝበለ’ቲ ዝበጽሓና ሓበሬታ- ስርዓት ኢሳይያስ ነቲ ሓደጋ ንምቁጽጻር ዝገበሮ ዋላ ሓንቲ ፈተነ ኣብ ርእሲ ዘይምህላው ብለይቲ ናብ ሆስፒታል ጊንዳዕ ዝወሰዶም ዜጋታት እኹል ሕክምና ከይረኸቡ ብለይቲ ክምለሱ ብምግባር ሂወቶም ኣብ ሓደጋ የውድቆ ምህላው ኣረዲኡ።

እዚ ስርዓት ኢሳይያስ ክሓብኦ ላሕ ዝብለሉ ዘሎ ከቢድ ሓደጋ ካብ ህዝብና ክኽወል ስለዘይክኣለ ወለዲ ብሃለዋቶ ደቆም ይሻቐሉን ደቅና ክንርኢ ንደሊ ኢና ኢሎም ጸቅጢ ይገብሩን ብምህላዎም እቲ ምልካዊ ስርዓት ኣብ ስግኣትን ሸቐልቀልን ወዲቁ ከምዘሎ ከኣ ተፈሊጡ’ሎ።

ኣብ መበል 20 ዙርያ ኣብ ዊዓ ዝተዓለመት ሽማ ክትገልጽ ዘይደለየት ዜጋ ነቲ ኣብ ዊዓ ዘሕልፈቶ ግዜ ዘኪራ ክትዛረብ ከላ ካብ ንቡር ወጻኢ ኣብ ዝኾነ ዋዒ ዘሕለፍክዎ ሃለዋት ከም ሃገራዊ ኣገልግሎት ዘይኮነስ ከቢድ ገበን ፈጺመ ዝወረደኒ ዘይርሳዕ መቅጻዕቲ ጌረ’የ ዝቆጽሮ ክትብል ከምዝገለጸት’ውን እቲ ሓበሬታ ብተወሳኪ ኣመልኺቱ።