![[AIM] Asmarino Independent Media](/images/logo/ailogo.png){kind=logo}
ደቂ ሐምሳ ስሳታት … ሕደጉ’ባ ለብሙ
ማሕበረ ሐማዮ . . . . . ከአ ጀሚርኩም’ዶ
ስጋ ሰብ ክትበልዑ . . . ከም ቀይሕ ብሩንዶ
ምሳኹም ምላድ’ስ . . . ኮይኑ’ምበር ንጋዶ
ሐኪምካ ዘይጸርዩ . . . ከም ዓበቕ በዲዶ።
ዘለፋ ስርሖም . . . ናይ ወረ እንዳስትሪ
ሐሶት ዘዳምቑ . . . ንሰብ መነወነሪ
ነዚ’ስ ተነዪቶምሉ . . . ጌሮሞ መፈከሪ
“ስነ ጥበባዊ” ዝብል ከአ … ወሲዶምሉ ዲግሪ።
እንቋዕ’ቲ ሐሶትኩም . . . ንፋስ’ውን አይኮነ
ህቦብላ አልዒሉ … . . . ዓይኒ ምደፈነ
እንቋዕ ወፈራኹም … ውሕጅ’ውን ነይኮነ
ንመሬት ዘባድም . .. ዘርኢ መቖንቆነ።
አካ ረአናዮ .. . . . እቲ ድርሳነ ጥልመት
ብቂም ጽልኢ ተዋጢሩ .. ምልክት ናይ ጽበት
ዓምቧዅ ኰኰዓዳ … ዘይብሉ’ኳ ክብደት
ነዚ’ስ ጊዜ ከተጥፍእሉ … የሕዝን’ዩ ብኡነት።
ሕዱር ቕርሕንቲኹም … መድሃኒት ስኢንክምሉ
አምሰልሲልኩም ብዋዕላ … ወየ ወየ ክትብሉ
ናይ ዝሞትወን ዘኪረን … ዝቁዝማ ክትመስሉ
ድጉል ሕማማትኩም’ስ . . . ገደብ ድአ ግበሩሉ
ሐፋሽ’ኳ ይፈልጦ’ዩ . . . ጉርሒ ናይ ጐሐሉ።
አንታ’ዘን መላሕስኩም … አደብ ግበሩለን
ክሰስ ወንጅል ዝብል .. ጫፈን ተሰቚረን
ተቓለስቲ ከጠቅራ . . . ምዓለን ምሕዳረን
ካን’ዶ ንሱ’ዩ . . . መትከል ምግዳለን
ገዛኢ’ኳ ዘይብሉ . . . ዕዳጋ ስኢነን።
ደቂ ሐምሳ ስሳታት . . . . . . ሕደጉ’ባ ለብሙ
ዝአረገ ክትሐኩ . . . መንእሰይ ከይትልክሙ
መርዚታትኩም አይኾኖን’ዩ . . . መፍትሒ ጸገሙ
አብ ትማሊ አይንበርን’ዩ . . . ናይ ጽባሕ ሕለሙ።
ንሎሚ ድሐን … . . . . ንሱ’ዩ ምኽርና
ብኸንቱ ከይጠፍእ . . . . ጊዜ ናይ ኩላትና
ንይበላኹም ክንምልስ … ድሕሪት ከይትጐቱና
ኲናትና አንጻር ህግደፍ ይቕናዕ . . . ክቐስን ህዝብና።
ደንቆሮ አይኮነን . . . ዓይኒ’ለዎ ህዝቢ
ንኹሉ ዝከታተል . . . ጉዳዩ ዝናቢ
ርግእ ድአ በሉ . . . ዋጋ የብሉን ናዕቢ
መስርዕ ተጸበዩ . . . ንሱ’ዩ ፍርዲ ውሃቢ
