እቲ ነቓዕ ተስፋ ክጽግን'ዩ !

ኣንቲ  ኣደይ..............!
እዚ ጊዜ'ሲ....

እሂና ዝወደይ ?

ብሓቂ'ስ ክቐድድ ዲዩ  ክወግሕ
ብሓቂ ክወግግ ዲዩ  ክጸብሕ
ብሓቂ ክሃጥር ዲዩ  ክሰብሕ
ብሓቂ ክትስእ ዲዩ  ክነቅሕ ?

ኣንታ ሊላይ ወደይ!.........
ከመይ ደኣ ዘይወግሕ......

ብሓቂ ክብርህ 'ወ ክቐትር
ብሓቂ ክደምቕ 'ወ ከም በራውር
ብሓቂ ክወግሕ 'ወ ባና ክበንን
ብሓቂ ክቐትር 'ወ ፍስሃ ክኸውን ።

እንዲዒ' ኸ ኣደይ!..........

ጸሓይ ኣጋግዘ ፡ ይጎየና 'ሎ
እዋን እቶ-እቶ ፡ ይጽልምተና'ሎ

ኣንታ ሊላይ ወደይ፡ እዝገ-ፍለጠካ!
እቲ-ምንታይ'ሲ....?

ብቱርኪ ናጽነት ምስደለና
ብጥልያን ናጽነት ምስደለና
ብጃንሆይ ናጽነት ምስደለና
ብደርግ ናጽነት ምስደለና
ብደቅና ናጽነት ምስደለና
ኣየናይ እዋን'ከ ምስቀሰ'ና !

ሊላይ ወደይ...............
ናይ ሎሚ ገደደ ብደቅና
ገረብ ብሓኽላ ፡ ብኸርስና
ብጩግራፍና ፡ ብወንጭፍና
ኣብ ግራትና ፡ ኣብ ደንቤና
ከም ደቂ ጓና ፡ ተኾርሚና

ሊላይ ወደይ...............
ባዕላቶም ኣዘዝቲ መኳንንቲ
ባዕላቶም ነደቕቲ ኣፍረስቲ
ባዕላቶም ሰራዕቲ ፈረድቲ
ባዕላቶም ሓዛእቲ-በየንቲ
መጕሰዖም ዘድርጉ በላዕቲ

ብዝኾነ ሊላይ ወደይ............
እንተ ሕጂ'ሞ፡  ሓዲኣ'ላ
እታ ማህጸነይ ኤህ ኢላ'ላ
ብርጉም ውላዳ  ተዳሂላ
ኣደ ርጉም ኰይና ተበዲላ
ኣደ ሕሱም ኰይና ተደፊራ

በሊ ኣደይ መዓረይ !
ጽንዓት ኣንበሳ ይሃብኪ.......

ብሓቂ...............................
ነቲ ቐራን ፡ ጸድፊ የውርደሉ
ነቲ እሾኽ ፡ ሓያል ይፍጠረሉ
ነቲ ለዋህ ፡ ለይቱ የውግሓሉ
እንተ ነቲ ዓሻ ፡ ጸሓዩ የዕርበሉ

ኣሜን ሊላይ ወደይ !

እታ ኪዳነ-ምሕረት ባዕላ'ላ
ትጥምት ተማዕዱ ኣንቆልቊላ
ትጽብጽብ መዓልታ ኣስተብሂላ
ክትሓርሶ ጥንሳ ኣውጊሓ-ኣራፊዳ
===============
የርህዎ ኣምላኽ /Yerhewo AmlaK