መአረምታ ብዛዕባ ኢሳይያስ ኣብ ከሰላ

ሰላም ኩቡራት ኤርትራውያን

ብ ዕለት 28-10-2011 ካብ ቲቪ ኤረ ዝረኸብኩዎ ብ ቪድዮ ዝተሰነየ ዜና፡ ኢሳይያስ ኣብ ከሰላ ኣብ ገዛ ገዲም ተጋዳላይ ዓብደላ ኢድሪስ በጺሑ ዝብል ምስ ተዓዘብኩ፡ ብዘይ ቃልዓለም ናብ ኣእሙሮይ ዝመጸ ሓሳብ፡ እዚ ተመን’ሲ እንዳ ሓርበኛ ዓብደላ ኢድሪስ ልዳት ክረግጽ ብምባል፡ ካብቲ ንሓርበኛ ሱዉእ ዓብደላ ኢድሪስን ንስድራቤቱን ዘለኒ ክብረትን ሓልዮትን ብምብጋስ፡ ብልቢ በቲ ፍጻሜ ስለ ዝሓፈርኩን ስለ ዝሓዘንኩን ጓሂየይ ብቕጽበት ናብተን ምእንቲ ሓርነት ህዝቢ ኤርትራ ዝቃለሳ ዘለዋ መርበባት ሓበሬታ ልኢኸ።

ይኹን እምበር፡ ብዕለት 29-10-2011 ካብ ክልተ ግዱሳት ኣሕዋት ብኣካል ዘይፈልጦም ብኢመይል፡ እቲ ኢሳይያስ ኣብ ከሰላ ዝበጽሖ ሰብ ተጋዳላይ ነበር ሳዓቢ ኢሳይያስ ኮይኑ፡ ብሂወቱ ዘሎ ዓብደላ ኢድሪስ ዝባሃል ከምዝኾነ ገሊጾሙለይ። ኣነ ብወገነይ ውን ኣብ ካርቱም ዝፈልጦ ሰብ ስለ ዘለኒ ብወገነይ ደዊለ ሓተትኩዎ’ሞ፡ ንሱ ውን ልክዕ ከማይ ዓብደላ ኢድሪስ ካብ በሉ፡ እሞ ድማ ኣብ ከሰላ ዳኣ፡ እንዳ ሱውእ ሓርበኛ መራሒ ጀብሃ ዓብደላ ኢድሪስ ክኸውን ኣለዎ በለኒ።

ኢለዮ፡ በል ንከሰላ ናብ ትፈልጦም ደዊልካ ዝተጻረየ መልሲ ሒዝካለይ ጽናሕ ብምባል ተሳማሚዕና ብቖጸራ ተፈላሊና። ሎሚ ዕለት 30-10-2011 ኣብ ቆጸራና ደዊለ ረኺበዮ፡ ዝሃበኒ መልሲ ድማ፡ እቲ ኣስማት ሓደ ምዃኑ ወላ ኣብ ሱዳን ውን ሰባት ኣደናጊሩ ኢዩ። ዝኾነ ኮይኑ ግና፡ ኢሳይያስ ኣብ ገዛ እቲ መምህር ጽንዓትን ሓቅን ዘይምብርከኽ መሰረት ብረታዊ ቃልሲ ዝኾነ ሱውእ ሓርበኛ ዓብደላ ኢድሪስ ከምዘይኣተወ ኣረጋጊጹለይ።

ብመጠን እቲ ሓዚነዮ ዝነበርኩ ድማ ሓጎስ ሰፈነኒ። ስለዚ ኩቡራት ተኸታተልቲ ጹሑፈይ፡ ነቲ ካብ ቲቪ ኤረ ዝረኸብኩዎ ዜና፡ ከምዘይትስሕትዎ፡ ንቦታን ነቲ ሽምን ኣብ ግምት ኣእቲኻ፡ እቲ ዜና ንቡዙሓት ሰባት ስለ ዘደናገረ ኣነ ውን ሓደ ካብቶም ዝተደናገሩ ስለ ዝኾንኩ፡ እቲ ዝጻሓፍኩዎ ካብ ሓልዮት ዝተበገሰ ምንባሩ ትስሕትዎ ኣይመስለንን።

ይኹን እምበር ንዝኾነ በቲ ኣብ መርበብ ዝወጸ ሓበሬ ዝተቐየመ እንተ ዳኣ ኣሎ ይቕሬታ ይሓትት።

ሳልሕ  ዓብደላ

ካብ ለምለም  ካናዳ

This email address is being protected from spambots. You need JavaScript enabled to view it.