ኢሳያስ ብሰብ፣ ሕዝቢ ብመትከል

ኢሳያስ ጉድ ረኺቡ። ንዓለምን ኤርትራን ሓንሳብ ተዓገሱኒ እዩ ዝብል ዘሎ። ን40 ዓመታት ዝተጠቐመሉ ናይ “ነገራት ከይዓበየ ምጭፍላቕን ምጥፋእን” ስልቲ ምስራሕ ኣብይዎ። ኩል ግዜ ኣብ ተጠንቀቕ ስለዝርከብ ሓንቲ ክንዲ ጣፍ ትኸውን ተቓውሞ ኣይጻወርን እዩ። ለንቅነ እሞ ብእገዳ ዝወረዶ ስምባደ ናይዚ ስልቲ ዘይምስርሑ፣ ከም ኣመሉ መን ኣሎ ብምባል ናብ ሰባት “ከምዚ ዘይትገብሩ፡ ከምቲ ዘይትገብሩ፡ እናበለ” ዘየለ ተቓውሞ ኣብ ሃገር ከምዘሎ ጌሩ ከርኢ ይፍትን ኣሎ። በዚ ከኣ እዩ ኢሳያስን መሰልቱን ብሰብ እዮም ዝዛረቡን ዝገበሩን እቲ ካብኦም ዝጥለብ ዘሎ ግን መትከላዊ  ናይ ሕዝቢ ነብሰ ምምሕዳርን ዕድሉ ብትካላዊ ኣገባብ ናይ ምውሳን ሕቶ እዩ።  

እዚ ብመስከረም 2010 ዝወጸ ጽሑፍ እዩ።
“እዝኒ ዘለዎ ይስማዕ፤ ዓይኒ ዘለዎ ይርአ”

ብጀካ ናቱ ቤተ ሰብ፤ እቲ ካልእ ሕዝቢ ጠምዩ፣ ደቁ ተወሲዶም፣ ስድራ ቤት ጠፊኡ፣ ሓዳር የለ ሕዳር የለ፣ ኣብ ስደትን ኣብ ሳዋን በረኻን ዶብን ተደፊኡ፣ ብናይ ስዲ ኣገዛዝኣ ናይ ሓደን፣ ኣተግበርቱን ስለዝሳቐ ዘሎ፣ ነቲ ኣብ ባጽዕ ተሓቢኡ ብተላኣኽቱ ንዝካየዶ ዘሎ ስርዓት ኣብ ምቕያርን መንግስቲ ኣብ ምልዋጥን የልቦን።

ኢንተርነት እውን ፈሪሑዋ (ኣብ ወጻኢ) ነዚኣ ክዓጹ ዘይፍሕሶ እልማ ዘይሓስቦ ወዲት የልቦን። ገረወኛን በርሚልን ሽሓንን ጥርሙዝን ኣብ ጥቕኡ ዘይምጽናሕ እዩ ዝበሃል ዘሎ። እቶም ኣብዚ ስእሊ ዝረኣዩ ናይ 2007 ደገፍቱን ኣብ ሰላማዊ ሰልፊ ወጻእቱን ኣብ ዝመጽእ ወርሒ ነዚ ብዓለም ለኸ ሕቡራት መንግስታት ዝተበየነሉ እገዳ ንምግልባጥ ኣብ ጽርግያ ዋሺንግተን ክወጹ ይሕተቱ ኣለዉ።

“ካብ ሳዕ በሎ፤ ሳዕ ምባል ይቐልል”ን “ዝገበርሲ ነዲኡ ነይነግር”ን ወሲኽካ ሓሸውየ ናይ ህግደፍ ማለት፤ ንመስመር ሓሳባት ደሞክራስን ናይ ደቅ ሰብ ጽቡቕ ድሌት ንዝሓሸ ናብራ ናብ ጎድኒ ከተዛሪ ምፍታን ይገርመናሎ።

መትከል ዲሞክራሲ ብድሌት ሕዝቢ ዝግዛእ መንግስቲ፣ ብወከልቱ መሪጹ ተመሪጹ ዝመሓደር ስርዓት፣ ከምድላዩ ሰሪሑን ሸቒጡን ሚሂዙን ዝህብተመላ ሃገር ዘይደሊ ኣብ ዓለም ዜጋ የልቦን ምተባህለ። ግንከ ነዚ ዘይደልዩ ዜጋታት ኣለዉ። ምኽንያቱ ከይሰራሕካ እትረኽቦ ስልጣንን፣ ኣብ ልዕሊ ፍጡር ሰብ ናይ ምቕታልን ምምሓርን ምቁጽጻርን፣ እንተደሊኻ ሓፍ፣ እንተደሊኻ ኣብ ባይታ ምስማጥ፣ ስሚዒት ዘሕድሮ ፍሉይ ወልፊ ኣሎ።

ብፍቕርን ብሓልዮትን ዘይዓበየ ኣሎ። ግንከ ንህይወቱ ኣማሓይሹን ንደቁ ፍቕርን ሓልዮትን ኣገባብን እናስነቐ ናይ ዝበለጸ ናብራ ምቁማትን ምብጻሕን ይከኣል እዩ። ሓደ እንተዘይበጹሑ መንገዲ ስለዝጅምረሎም ደቁን ተኸተልቱን ብኡኡ ክኸዱ ከምዝኽእሉ ብተመኲሮ ተራእዩ እዩ።

ስለዚ ኸኣ እዩ ኣብ ዝበዝሕ ናይ ዓለም ሃገራት ኣብቲ ሰብ ነጻ ዝኾነሉ ቦታ እዩ እቲ ዝበለጸ ሃብትን ሓጎስን ዝርከብ።