ሃገራዊ መዝሙርና ንቕይረሉ እዋን ሕጂ ኢዩ፡፡

• ብግዝኣተ ኣህጉራዊ ሕጊ ምኻድን ብግዝኣተ ሕጊ ተቐይድካ ኣብ ማዕርነትን ልዑላውነትን ሃገርካ ኣሚንካ ንመሰልን ፍትሕን ቀዳምነታት ዝህብ መዝሙር።
• ስላም ፍትሒ ሓርነትን ናጽነትን ዘማዕብል መዝሙር፡።
• ንህንጸት ንልምዓት ቀዳምነት ሂቡ ኣእዳው መንእሰያት ኣብ ክንዲ ጠብንጃ ፒሮን ጥራዝን ሒዘን ክፈልጣን ክመሃራን ክመራመራን ዘተባብዕ መዝሙር፡፡
• ኣእዳው ሰራሕተኛታት ኣብ ክንዲ ጠበንጃ ማርተሎን ሞዶሻን ሒዘን ንምዕባለ ዘመናዊ ተክኖሎጂ ዘማዕድዋ ዝገብር መዝሙር፡፡
• ነእዳው ሓረስቶት ኣብ ክንዲ ጠበንጃ ዕርፍን ዘመናዊ ትራክተራትን ሒዘን ዘመናዊ ሕርሻ ኣስፋሕፊሑ ሃገር ልምዓት ዝስልም ንኽኸውን ዘተባብዕ መዝሙርን ተግባርን የድሊ ኣሎ፡፡
• ንገድ ነጋዳይ ሕረስ ሓረስታይ ዝብል መዝሙር፡፡
• ንዓዱ እሾኽ ኮይናቶ ናብ ፈቐዶ ስደት ዘምርሕ ዘሎ መንእሰይ ብዘይ ፍርሕን ራዕድን ኣብ ዓዱን ሃገሩን ኮሪዑ ኣፍራዪ ዜጋ ዝኾነሉ መዝሙር።
• ኣብ ስደት ዘሎ ምሁርን ብዓል ሞያን ናብ ሃገሩ ተመሊሱ ንሃገሩ ዘመዕብለሉ መዝሙር ብቕዋምን ብፍትሕን እናተመራሕና መንፈሳዊ ሓርነትና ዓምቢቡ ባይቶና ሰፊሑን ተርኡ ደሚቑን ንዜጋታቱ ዋና ሃገሮም ሙዃኖም ዘረጋግጽ መዝሙር የድልየና ኣሎ፡፡

"ብዓል ደማ እናልቀሰ ተደምሲሱ"፡፡  እወ። ቀዳማይስ ተደምሲሱ ግን ካልእ ዘይተጸበናዮ እንደ`ሞ መጺኡ!! ናይ ታሪኽ ሓደጋ ኣጋጢሙ። ካብቲ ዝተደምሰሰ ዝብኣሰ ነኻስ ጡብ ወላዲቱ “ህ.ግ.ደ.ፍ” ዝብሃል ዝያዳ  ደም የንብዓ ኣሎ ንሃገር፡፡  ነቲ መስዋእቲ ከፊሉ ትእምርቲ ጽንዓት ኮይኑ ዓወቱ ዘረጋገጸን ዘመስከረን ሓርበኛ፣ ብኣብ ጽንኩር ኩነታት ተሓብኢኦም ጊዜኦም ዘሕለፍዎ ጎራሓት ተጠሊሙ ዳግማይ መስዋእቲ ይኸፍል ኣሎ፡፡ ገሊኡ ኣብ ፈቐዶ ሸላታትን ጎዳጉድን ገሊኡ ከም ከብቲ ብሓጹር ጨዓ ተሓጺሩን ተቐይዱን ኣሎ፡፡ ገሊኡ እውን ካብ ብደሙ ናጻ ዝገበራ ሃገሩ እሾኽ ስለ ዝኾነቶ ሃጽ ኢሉ ናብ እግሩ ዝመርሖ ይነፍጽ ኣሎ፡፡ ስለዚ እምብኣር`ዩ ብተግባር ዝትርጎም መዝሙር ዘድሊ ዘሎ፡፡
 
እዚ ንጽንብሎ መበል 19 ዓመት ናጽነትና ናብ ሓቀኛ ናጽነት ንክንቅይሮ ብሓባር ንኸይንልዓል ዝጽግመና ኩነታት ኣለሊናን፣ ንድሑር ሕብረተሰብኣዊ ሕማማት ያዕ ኢልና፣ ጸባ ሓንቲ ላምን እቶት ሓንቲ ግራትን፣ ኮይና ምስ እንልዓል። ሎሚ እውን ከም ትማሊ እቲ ዓወት ዓወት ህዝቢ ኢዩ፡፡ ኣብ ክንዲ እዚ ውድብ`ዚ ከምዚ እንትዝገብር እቲኦም ከምዚ ምባሎም ጌጋ ኢዩ እቲኦም ከምዚ ምምላሶም ጌጋ ኢዩ እንዳበልና ንኻልኦት ክነቅፍ ንውዕል ነብሰ ነቐፌታ ጌርና እዛ ብመስዋእቲ ብሉጻት ዜጋታታ ዝተረኽበት ሃገር ናይ ዋናታታ ክንገብራ ንበገስ፡፡

ናይቶም ንለውጢ ዝቃለሱ ዘለው ዘይምውህሃድን ዘይምስምማዕን እንተ ብቐጥታ ወይ ብተዘዋዋሪ መንገዲ ንህ.ግ.ደ.ፍ ስለ ዝሕግዝ እቲ ብምጽውዋር ክሕለፍ ዝግብኦ ብትዕግስቲ ሓሊፍና ነዚ ጸረ ሃገርን ህዝብን ዝኾነ ጉጅለ ኣብ ምቅላስ ቀዳምነታት ሂብና ክንምርሽ ኢዩ ዘሎ ኩነታት ዝጠልብ፡፡

እቲ ብሓርበኛታት ዝኽፈል ዘሎ ዳግማይ መስዋእቲ ንኹሉ ዜጋ ዝኽእሎ ክገብር ይጽውዕ ኣሎ፡፡ እቶም ኣብ ሕሱም ቤት ማእሰርቲ ህ.ግ.ደ.ፍ ዝሳቐዩ ዘለው ዜጋታት ዝፈጸምዎ ሓጥያት የብሎምን። ንሕና ስለ ዝሓመቕና ኢዩ ስቓዮም ዝናዋሕ ዘሎ፡፡
 
ቢተወደድ ኣብርሃ 19 ዓመታት ኣብ ቤት ማእሰርቲ ክበሊ እንከሎ ንብመስዋእቲ ብጾቱ ዝተማረኸ ንብረት ብኣብ ወረቐት ዘይተጻሕፈ ዘይወግዓዊ ዕርክነት ኢሳያስን መለስን ተቓዊሙ ነቲ ብመስዋእቲ ብጾቱ ዝተማረኸ ንብረት ንብረት ሃገር ኢዩ ብምባል ብዘይ ወግዒ ናብ መሸጣ ከይውዕል ስለ ዝተቓወመ ጥራይ ኢዩ፡፡
 
ሃይለ ድሩዕ ኣብ ቤት ማእሰርቲ ዒላዒሮ ዓይኑ ዓዊሩ ዝሳቐየሉ ዘሎ ምኽንያት ጉድለታትና ንኣርም ሕድሪ ስውኣትና ከምዚ ኣይኮነን ስለ ዝበለ ኢዩ፡።

ጴጥሮስ ሰለሙን ኣብ ዒላዒሮ ብሓጺን ፌሮ ተኣሲሩ ምስ ብዓልቲ ቤቱ ዝሳቐ ዘሎን ደቁ ዘኽቲሞም ዘለውን ብብልሑ ንሕንጻጻትን ሜላታትን ኩናት ጀነራላት ሶቬት ሕብረት ነበር ኣፍሺሉ ናጽነት እሙን ዝገበረ ጅግና ኢዩ፡፡ ኣብ መወዳእታ እውን ከም ሸሪፎን ካልኦትን መብጽዓና ንጠልም ኣሎና ስለ ዝበለ ኢዩ ሓንሳብ ብሲኣኤ ሓንሳብ ብዕልዋ መንግስቲ ዝኽሰስ ዘሎ።

ብሪጋደር ጀነራል ኢስቲፋኖስ ስዩም ካብ ሕቡራት ኣሜሪካ ነቒሉ ናብ ጎቦታት ሳሕል ተመሊሱ ምእንቲ ሃገሩ ክቃለስ እንከሎ ኣብ ናጻ ኤርትራ ኣይኮነን ንባዕሉ ክእሰርስ ካልኦት እውን ክእሰሩ ትጽቢት ኣይነንበሮን፡፡
 
መምህር በራኺ ገብረስላሴ ዘረባ ማሕበረሰብ ዓለም ንስማዕ ስለ ዝበለ እምበር ብኽሕደት ሃገር ኣይኮነን መስዋእቲ ዝኸፍል ዘሎ ክንደይ ኢልካ ክትንተን፡፡ ንምዝኽኻር ግን እኹል ይመስለኒ ስለዚስ ብታሪኽ ከይንሕተት ሃየ ተቐላጢፍና ንበገስ፡፡
 
ዝኽሪ ንሰማእታትና
ፍትሒ ነቶም ምእንቲ ህዝቦምን ሃገሮምን ዝሳቐዩ ዘለው፡፡