ንብዓል ነጎዳስ ሓዊ ደብሶ!!!!!!!!!! - መጋረጃ ይቀንጠጥ 26

ባይቶ ቖይሙ ብእግሩ ከይከደ

ታተ ከይበለ ከሎ ዝኸርደደ

ደበና ዘይብሉ ዘንጎድጎደ

መዓንጣኡ ፍቱሕ ዝተቐደ።

ኣደቡሓዶ! ኣዋሳ! ኩሉ ሓደ

ሹዱሽተ ሚእቲ ኣባል ዘኤንገድ

ጉዳይ ሃገር ክመክር ዝተሰደ

ኣብ ኣዋሳ ኣንጸላለወ ዝኸበደ

ብዉሑዳት ዓመጽቲ ዝኸድከድ

ብተግባሮም ጉባኤኛ ሓዘነ ዓበደ

ተስፋ ኣይትቑረጽ ኢልካ ተኣበደ

ዘምጽኦ ከይፈጸመ ነንዓዱ ከደ።

ተበላጺ ዝኾነ ኩሉ ተዛመደ

ኣደቡሓ ዝዓበየ ኩሉ ተኣንገደ

ብጽሒቱ ዝረኸበ እናሰገደ

ንህዝቢ ዘይኮነስ ናትና ግደ

ኣቐዲምና ንሓዝ በብ ሓደ

ርኢናዮ ኩሉ ዘሸበድ በደ

ብኽረምቲዶ ጨው! ይንገደ

ማይ ምስ ኣተዎ ፈሲሱ ኸደ

ክጅምር ከሎ እዩ ዝሓንገደ።

ህዝበይ ኣበይ እዩ ናትካ ግደ

ናይ ኪዳን ባይቶ ፍሹል ዝገደድ

ንህዝቢ ዘይሓስብ ዝዓበደ

ንኸይጥርንፍ ህዝቢ ዝሓንገደ

ብቂምን ቅርሕንትን ዝበድበደ

መንእሰይ ንኸይቀርቦ ዝሰወድ

ሙሁር ንኽርኢ ይብል ሸበድበደ

ሙሁር ጸሊኡ ኣብ ጸጋይ ሰገደ

ብተዳሙን ሳግምን ዝተጸምደ

ከይጀመረ ብምድስካል ዘሳድደ

ንኩናማ ንዒቑ ደጊሙ ኣሳደድ

ናይ ዮሱፍሞ! ሕጂስ ንኹሉ ኣዕብደ

ብብሽኮቲ እንግሊዝ ዝሰወደ

ህዝቢ ተበራበረ ኣርኢ ናትካ ግደ።

ኣየድልን ጉባኤ ናይ እዚኦም

እምበርዶ ሓልፍነት ህዝቢ ይርዶም

ህዝቦም እናተቅዝፈ ኣብ ቅድሚኦም

ዘይሰርሑሉ እናተመገቡ ጸጊባቶም

ኣኺሉ እዩ ተጸንቂቑ ዓቕሞም

ይግደፉዎ ስልጣን ጠቓሊሎም

ብቕዓቶም ተወዲኡ ምስቲ ዕድሚኦም

ኣብ ሙዝዩም እዩ ነይሩ ስፍራኦም

ኣኸቲሙ እዩ ቃልሲ ኮነ ታሪኾም።

መንእሰይ ተበራበር ብሓበራ

ሓልፍነት ሓገርካ ተሰኪምካ ጹራ

ተልዓል ተኾልኮል ጭማራ

ክሳድካ ንየማን ንጸጋም ኣዙራ

ወለድኻ ነይሮም ደቂ ዕስራ

ይዘሉ ይነጥሩ ከም ዛግራ

ሃገርካ ክትመርሕ ጋማኻ እሰራ

ድልየትካ ክትረክብ ብረትካ ዕተራ

ግዜ የልቦን ተቓላጠፍ ዛሓጹር ስገራ

ኣሕዋትካ ኣብ ፈቐዱ እናተደፍራ

ሃገርና ኤርትራ ብድኽነት ተጻዒራ

ጸነተት ከይበሉኻ ከድካ ዙራ

ኣድሕና ከይበረሰት ሃገርካ ኤርትራ።

ዉድቀት ንኹሎም ተጻባእቲ ህዝቢ

ኣብደገን ኣብ ዉሽጥን ኤርትራ

ሃይለ ገብረትንሳኤ

ኢንድያናፖሊስ ኢንድያና

2 ነሓሰ 2013