ሓጸር ዛንታ ኣቦይ ጀማልን ኣደይ ዘምዘምን

ኣደይ ዘምዘም ብኻልእ ዕዮ ገዛ ወሓለ'ኳ እንተዀና፡ ሕንባሻ ኣብ ምሕንባሽ ግን ኢደእግሪ ኣይነበረንን፡፡ ወትሩ ንሰን ዝሕንብሸኦ ሕንባሻ ገለ መንቅብ ከይተረኽቦ ይሓልፍ ኣይነበረን፤ ማለት፥ ወይ ይመጽጽ፣ወይ ኣይቦክዕን፣ ወይ ጨው ይዝጋሕ፣ወይ  ኣይበስልን፣ ወይ ከኣ ይሓርር ስለ ዝነበረ፡  በዓል ቤተን ኣቦይ ጀማል ንሰን ዝሓበሸኦ ሕንባሻ  ሞት-ተዀነ ልኽፍ ኣይበልዎን ኢዩም ኔርም።  በዓልቲ ቤቶም ኣደይ ዘምዘም ግን ምሕልፎ፡ ሕንባሻ ኣብ ዝሓንበሻሉ ቀዲመን ንዖኦም "ኣቦይ ጀማል !  ጆባእ" ኢለን ምዕዳል ብአኦም'ኳ ዝጅምራ እንተነበራ፡ ንሶም "ደሓን ኣነ መዓስ ሕንባሻ ይፈቱ ኰይነ !" ብዝብል ምኽኒት ስምዒተን ከይትንከፍ ሕማቕ ቃል ከየውጽኡ (ከምዛ ንሕባሸአን ዘይጸለእዎ) ልሳኖም እናጥዓሙ ይቕበልዎን ኣይነበሩን። ብልቦም ግን "እንታይ ወረድዋ'ዩ ንጥቅዋት ደቃ ኣርእያኒ ኢላ ምሕንባሽ ዘይትመሃር?  ወረግ ክሳብ መዓስ'ያ ሓቲታ ከይትመሃር ትምክሕቲ ኣሕድራ እኽለ-ማይ ከተበላሹ ትነበር ! ወይ ጉድ !!"  እናበሉ የስተንትኑ።   ሓደ መዓልቲ ናይ ፈጅር ሰላት (ናይ ወጋሕታ ስግደት) ሰጊዶም ምስ መጽኡ፡ ኣብ ናይ መስጊድ ተርቲብ (ኣብ መስጊድ  ብቐንዱ ንዝሓደሩ ኣጋይሽን ድኻታትን ዝዕደል ቊርሲ) ዝተዋህቦም ንቕያ ዘብል ሕንባሽ ንገዝኦም ተማሊኦም፡ ንኣዝዮም ዝፈትውዎ ሕሳስልደ ወዶም "ጆባእ ዝወደይ!" ኢሎም ይህብዎ። ኣደይ ዘምዘም ክዕዘበኦም ጸኒሐን፡ ነገራቱ ጋን ኰንወን ንወደን "ንዓስከ ዝወደይ!" ብምባል ጸዊዐን ካብቲ ዝተዎህቦ ሕንባሻ ቆሪሰን ይጥዕመኦ። ብኡንብኡ ከይተፈለጠን ግልብጥ ኢለን  ከኣ ናብ ኣቦይ ጀማል ብምጥማት፡ "ስምዑስኪ! -- እዚ ሕንባሻ ኣብዚ ገዛ እንታይ ክገብርን ካበይን'ዩ መጸኡ? ኢለን ድቦላዊ ሕቶ የቕርባሎም። ንሶም ከኣ  ኣጋውል ሕቶ በዓልቲቤቶም ናበይ ዘምርሕ ምዃኑ ዘየምልጦም በሊሕ ሰብኣይ ስለ ዝዀኑ፡ ብቋሕ-ሰም "ነቲ ዝሓመመ ሕንባሻኺ ክበጽሖ ካብ መስጊድ መጽኡ ኣጅሪ  (ጽድቂ) ክረክብ" ኢሎም መለሱለን። ንሰን ድማ ትቕብል ኣቢለን "ንሱኽም ድኣ  ተረካብ መልሲ መዓስ ይጠፍኣኩም ኰይኑ! ዋሎ እንደኹም!" ብለኦም ኰርፈፍ ኢለን። ንሶም ከኣ ኣስዕብ ኣቢሎም፡ " ኣብ ልሳን ዋሎ ኣሎ ወለሎ፣ ዝፍውስ ናይቲ ሕሙም ሕምባሻኺ ሰልሎ ! " ኢሎም  ንዝቐደመ ባጫኦም ባጫ ወሲኾም መለሲን ስጕድም ከም ዝብላ ገበርወን።

ያሲን ዑመር

(This email address is being protected from spambots. You need JavaScript enabled to view it.)