ዘይትሓፍር ድሙ፡ ኣብ ባይቶ ትፈሓስ
ዘይትሓፍር መርዓት፡ ንዓሻ ትወሓስ!
 
በዓል ንሰባሃከ !........

ሕፍር  ከይበሉ፡ ሕንኽ  ከይበሉ
ጉልባቦም ቀሊዖም፡ ከምዚ'ብሉ...

ሳላ ጽፍርና፡ እንታይ ተሳኢኑ
ሳላ ቅልጽምና፡ እንታይ ቀጢኑ

ኩሉ ጸባ ሰትዩ ፡ ኩሉ ተዓንጊሉ
ኩሉ ጠጢዑ፡ ኩሉ ለምሊሙ ።

ብዘይ ስክፍታ.............

ክንዲ ሕሰም ፡ ክንዲ መስደመም
ክንዲ ብድዐ ፡ ክንዲ መርመም

ክንዲ ጥሜትና፡ ክንዲ ጽምኣትና
ክንዲ ሕሰምና፡ ክንዲ ምረትና

ክንዲ ዝቖረርና፡ የሐወ የሐው ዝበልና
ጽጋብ ተጠሚቕና፡ ሕንቃቐ ተሰሊምና ።

ብዘይ ስክፍታ.............

ዘይሓፍር መርዓዊ፡ ኣብ ዳሱ ይጀሃር
ዘይሓንኽ ማዓኮር፡ ብዓሻ ይመሃር

ዘይሓፍር ውሉድ፡ ወላዲኡ ይኸስስ
ዘይስከፍ መልሓስ፡ ዘየሎ የንፍስ

ከም ደግለል ዝራብዕ፡ ሞግስዑ ይመልስ  
ሓቂ መሲልዎ፡ ለባም ዘይቅልስ ።

እንተዘይ ተሰኪፍካ............

ተባዕታይ ሓሶትካ፡ ሓቂ ይመስል
ኣምሳሊ መልሓስካ፡ ልቢ የቑስል

ገመድ ፍሕሶኻ፡ ተስታይ የንጠልጥል
ማሕጸ ቶንኮልካ፡ ገረድ ይሰቅል

ፍላጻ መልሕስካ፡ ዓዲታት ይነቅል
ሓሳዊ ከናፍርካ፡ ኮላሊት ይመቅል ።

መስጣ ኣለዎ..............

ዝራባዓት ሓሪድካ፡ ኣይወዓልኩን
ዒሸላት ኣጥሚኻ፡ ኣይቀዋዕኩን

ኣፍላጋት ኣንጺፍካ፡ ኣይረኣኹን
ሕድሪ ጠሊምካ፡ ኣይጠለምኩን

መሰል ቀቢርካ፡ ኣይነበርኩን
ህይወት ኣጥፊእካ፡ ኣይኣበስኩን

ኤእ!ሚካኤል ይመስክር !