ሰራዊት ሕድሪ ዞባ እስራኤል ምዱብ ወርሓዊ ኣኼብኡ ኣካይዱ:

ኣብ’ቲ ብዕለት 30/01/2014 ዝተኻየደ ኣኼባ ህልው ኩነታት ህዝብን ሃገርን ኤርትራን ደምበ ተቓውሞን ህልው ኩነታት ሰራዊት ሕድርን ኤርትራዊ ስደተኛ ኣብ እስራኤልን ብዕምቆት ዘቲዩ። እቲ ብኣቦ ወምበር ሰራዊት ሕድሪ ዞባ እስራኤል ብጻይ ጥዑምዝጊ ተመሪሑ ንንውሕ ዝበለ ሰዓታት ዝተኻየደ ኣኼባ ኩለ መዳያዊ ኩነታትን ምዕባለታትን ብዝርዝር ገምጊሙ።

ብጻይ ጥዑምዝጊ ኣብ’ቲ ኣጋጣሚ ንዕላማ ሰራዊት ሕድሪ ክገልጽ ከሎ; “ዕላማን ተበግሶን ሰራዊት ሕድሪ፥ ኩሉ ውድባዊ ውድድር ንጎኒ ገዲፍና ቅድም ቀዳድም ብሓባር ሃገር ምድሓን ውድድር ድሕሪ ድሕነት ሃገርን ህዝብን ምርግጋጽ ክግበር ዝኽእል ምዃኑ ንኣምን ።” ኢሉ። ብጻይ ጥዑምዝጊ ብምቕጻል፥ “ሃገር ኣብ ሓደጋ ወዲቓ ኣብ ዘላትሉ እዋን ኣማራጺና ሓደን ዘይማትእን ውሳኔ ምዃኑ፥ ንሱ ድማ ኩሉ ኤርትራዊ ብሓፈሻ ኩለን ተቓወምቲ ውድባትን ምንቅስቓሳትን ድማ ብፍላይ ሓደ ሓበራዊ ሃገራዊ ጥርናፈ ብምፍጣር ሽግር ኤርትራን ህዝባን ኣብ ምፍታሕ ከተኩራ እተን ወተሃደራዊ ክንፊ ዘለውን ድማ፥ ወተሃደራተን ናብ ሓደ ሓበራዊ ወተሃደራዊ ” እዚ” ጠርኒፈን ዝተማእከለ ሃገራዊ ሰራዊት ብምምስራት፥ ሎሚ ንስርዓት ህ.ግ.ደ.ፍ ኣብ ምእላይ፤ ድሕሪ ውድቀት’ቲ ስርዓት ድማ ኤርትራ ካብ ግዳማውን ውሽጣውን ጸጥታዊ ስግኣት ዘድሕና ሓበራዊ ዘይሻራዊ ሓይሊ ናይ ምምስራት ግዴታ ኣለውን።” ድሕሪ ምባል ። ንተበግሶ ኣባላት ሰራዊት ግንባር ሃገራዊ ድሕነት ኤርትራን ኣባላት ሰራዊት ምንቅስቓስ መንእሰያት ንዴሞክራስን ፍትሕን ኤርትራን ከም ኣብነት ብምጥቃስ፥ ነዚ ክውን ንምግባር ኣብ ኩለን ጥርናፈታት ዘሎ ዜጋ ኣድላዪ ተበግሶ ክወስድ ጻውዒት ኣቕሪቡ ።

ንህሉው ኩነታት ኤርትራዊ ስደተኛ ኣብ እስራኤል ክገልጽ ከሎ፤ “ ስደት መፍትሒ ከምዘይኮነ ብምግላጽ፤ እንተኾነ ግን እስራኤል ናይ ስደተኛ መሰልና ክሳብ ዘየኽበረት መሰልና ንምርግጋጽ ከይተሓለልና ክንሰርሕን ኣብቲ ዝካየድ ዘሎ ሰለማዊ ሰልፊ ዘለና ኣበርክቶ ድማ ብዝበረኸ ዓቕሚ ክንቅጽሎ ኢና።” ኢሉ።

ኣብ መወዳእታ ኣኼባ ካብ ተሳተፍቲ ብዝወረደ ሕቶ ርኢይቶን ለበዋን ብዕምቆት ብምዝታይን ናይ መጻኢ መደባት ብምሕንጻጽን ተዛዚሙ።

01/02/2014
ዓወት ንሓፋሽ ብተግባር !!!
ክፍሊ ዜና ሰራዊት ሕድሪ ዞባ እስራኤል