Asmarino Fundraising: Because There Is So Much More to Be Done!

ሓዲሽ ዓመት

 

ሓዲሽ ዓመት

 
ምስ ባህለይ ንኽላለ
ዓውደ-ዓመት
ዘዕበየኒ ሓንሰ መስቀለ
ዓዲ ኪምህለል
ሽግ እናንቀልቀለ
ሆየ ሆየ እናበለ
መንእሰይ ኪጻወት
ሓዊ እናዘለለ
እወ ሓዲሽ ዓመተይ
ሽዑ’ዩ ዝነበረ።
 
ኣዋልድ ዓደይ
ዝመስላ በራውር
ክደርፋ ክውዕላ
ኣብ ግራት ኣብ ሰፈር፣
እናተቐባበላ ክብላ
“ንሓንሰይ
ንመስቀለይ
ድርብ ከበሮ ሓዛለይ!”
ጎራዙት ዓደይ
ኣኽሊለን ሕዮባ
ዚመስል ሓሊብ ጸባ
ዘብለጭልጭ ከም ፀሓይ
ይዝከረኒ’ሎ ንቡር
ዓውደ-ዓመተይ
ምስ ታሪኽ ያታይ ሥሙር።
 
ጓኖት ብባህልና ክቐንኡ
ክጽሕፉ ክድነቑ
ደቂ ሃገር ግና -
መሲሎም ዝተራቐቑ
ውዲት ጌሮም ባህልና ከጥፍኡ
ክርሳዕ ተናዒቑ
ከብርስዎ ዓጠቑ
ልኢኾምሉ
እልፊ ወርጠበ ቆልዑ
ሓኽሎም ናብ ጽላል ኣቕኒዑ
ሱር መሰረቱ ተበርቍቑ
መንነትና ተነቓኒቑ
ንያትና ተጸንቂቑ
መንፈስና ብሁከት ተጨኒቑ።
 
ኣምሰያኡ
ሓዲሽ ባህሊ ተተኪኡ
ተኣዚዝና “ብኡ ኵርዑ”
ከይንሓትት ተዓጊትና
ተባሂልና “ተወዲኡ
ኮንይንኩም’ዩ
ፍተዉ ጽልኡ
ዝበልናኩም ምስ ዘይትሰምዑ
ልዕሊ ቃልና
ብኽርክር ትዋስኡ
ብዕድልኩም
ብሕይወትኩም ትጣልዑ።” 
 
ምኽንያቱ ተባሃለና -
“ምስ ዓለማት ዘላሊ
ኣምጺእናልኩም መማዕበሊ
ዝጸንሓኩም ብላይ ባህሊ
ኔው በሉዎ መድሓርሓሪ
ጭቆናኹም መዘከሪ
ምስ ጎረቤት መጣመሪ
ንመሰልኩም መደናገሪ
ኣብ ርእሰ-ተኽእሎ ዘይኣማኒ
ምስ ዕላማና ዘየሳኒ
ደርብዩዎ ብላይ ሳእኒ።
 
ንሕና ድማ፡
ከይሓሰባና
ከይመርመርና
ብህርፋን ናጽነት
ብጽምኢ ሓርነት
ተደፊኑ ኣዒንትና
ንመሰል ንማዕርነት
ንፍቕሪ ንሓድነት
ተሃንጢዩ ልባንትና
ብኣሚን ጎይታይ
ፈለማናዮ
ሓዲሽ መንነትና
ንኽንምስርት
ምድረ ገነት
ጀመርናዮ ብዕሽነት
ከየስተውዓልና
ንመቝሕ ንሰለት
ዚመልሰና ናብ ባርነት።
 
ወዮ ህሩፍ ባህግና
ምስ ባህልና ምስተጋጮ
ኣልበሱና ቆማል ወጮ
እንተበልና ናብይ ገጻና
ለከቱና ድርብ ማዕጾ
ሎሚ ግና እንተበልና
ብሩኽ ሓዲሽ ዓመት
ዓዲ ጓና ሃገር ስደት
ምስ ከባቢ
ንመሳሰል ከከም ኵነት
የጽንሓና ዓመት ዓመት
ይዕቆረና ዕለት ዕለት
ሃምና ግን ናብ ባህልና
ንመስከረም’ዩ ዚቋመት
ትልሚ ቃልሲ 
ቦዅሪ ዓመት
ተባሪኽና ተመሪቕና
ብፍትሒ ብዓወት
ከምትጽቢትና ሩፍታ ርሓት
የብጽሓና ናብ መስከረም
ክነብዕላ ብዘይፍርሓት
ንኣምላኽና ብምስጋና
እናቕረብና ክብሪ ስብሓት
ዘውጽኣና ካብ ክራማት
ዘምጽኣልና ቀውዒ ጽብሓት
ተቐሪብና ጠስሚ ገዓት
ተኻፊልና ሸዊት ግራት
የድግመና ዓመት ዓመት
የጽንሓና የብጽሓና
ንዓመታ ከምዛ ዕለት።
 
ፍሥሐየ መብራህቱ

 

 
BLOG COMMENTS POWERED BY DISQUS
 

Videos

Latest Comments

Announcements