ጒንበት ተሰካሚት መጽዓኛ

ኣይፈልጠክን ዝብል ገበነኛ

ጒንበት ጓል ኣዳልና ኣቲ ዕለት

ዘይትኣርግ ዘይተውጽእ ሽበት

ኣደ ጅግና ብዓልቲ ቀለቤት

ዓውደ ዋርሕ ብደም ዝተጻሕፈት

ኣይፈልጠክን ‘ተለ ዘይውዓለ

ኣነስ እፈልጥ’የ ወዲ ክፍለ

ብህጻነይ ምሒለ ጥሒለ

ዓቐብን ቍልቍልን ተፈቲለ

መንእሰይ ኣኽብራ ወላዲትካ

ወርሒ ጒንበት ኤርትራ ሃገርካ

እትረፍ ውሉድ ጓና’ኳ ኣሚኑ

ብዓል መን ምዃኖም ‘ቶም ጀጋኑ

ሓቂ ፈርዩ ትምክሕቲ መኺኑ

ኲምራ ሓሶት ዝገዝኦ ስኢኑ

ወርሒ ጒንበት ናይ ወጽዓት ሸደድ

ክንደይ ዘይጠለሙ ከይትውለድ

ጸላእትኺ ጀሚሮም ሸበድበድ

ልሕጺ ሒዞም ዝተበትከ ገመድ

እምም በሎም ሓሶት ዝምድሩ

“ፈሊጣውያን” ታሪኽካ ዝቐብሩ

በቕሊ እንተሰረርና ሰብ ሓለንጊ

ኣብ ባይቶ እንተቖምና በርቃይ ዘንጊ

እንተ ተጎምጎምና ቅጭን ፈርጊ

እንተ ተማጐትና ደብተር ሕጊ

ጥፉእ ሓዊ ብሕጂ ክኣጒዱ

ናይ ድኹማት ቀሸም ከንበድብዱ

ወርሒ ጒንበት ገለ ተወሊዱ

ከም ኣመሎም ይስገሩ ይስገዱ

ኣነስ ኢደይ ሂበ ኣሰይ-ኣሰይ

መተካእታ ረኺበ መንእሰይ

ቃልሲ ውጹዕ ረሲዖም ሰረቱ

ብነጸላ መንደቕ ዝምጒቱ

ኣርዒዱዎም መንእሰይ ከቲቱ

ናይ ለብዘበን ይፈለጥ ብልሓቱ

ኣብ ምቕራብና ጀሚሮም ፍትሊ

ስቕ እንተልና ‘ተገበርና ዓቕሊ

ጒንበት ንገርዮም ናይ ትማሊ

ቀምቕ ውሽጦም ክወጽእ ብላዕሊ

መንእሰይ ተልዓል በል እምብለይ

ደግሲ ኣለዎም ብዓል ጠለይ-ጠለይ

እንተበልኩ ኣነ ሓጺሩኒ

ተደቢሩ ይስዕስዕ ጒዳም ግኒ

ሬሳ ቐደም ዝተጸቕጠ እምኒ

ኣሎ ገና ኣይሞተን ይብለኒ

መንእሰይ ተዓጠቕ ተበራበር

ወርሒ ጒንበት ምስክርካ ግበር

ኣይጠፍኡን’ዮም ዝጠዓሞም ዒደር

ዓይኒ ክፈት ኣይትበል ደምበርበር

መንእሰይ ብዓቶም ኣለልያ

ጐተና ሸፋቱ ሰፈር ሕብያ

ሎምስ ድማ ክመጹ ብጒንበት

ናውቲ ሰውራና ዝጸረበት

ማሕረሻ ጀጋኑ ሓያል ስበት

እንታይከ ዘይገብር ዓቕሊ ጽበት

ዋዛ’ይኰነን ናይ ጒንበት ምህርቲ

ኣስተውዕል መንእሰይ ሕዱር ዛርቲ

ኣይበለዩን ናይ ሓሶት ፈለስቲ

ኣለሊኻ ፍለጥ መጋይሽቲ

ሓንቲ ሂቦም ዝወስዱ ሰለስተ

ንመን ኢኹም በሎም ወድ-ኣይተ

ረድኢ ክፍለ (ባሻይ)