Asmarino Fundraising: Because There Is So Much More to Be Done!

ዝሓበጠ ኣይሓውን ከይመገለ

ዝሓበጠ እቲ ሃርሃር ዝበለ
ፈጺሙ ኣይሓውን ከይመገለ
ወዲ ሰብ ኣይሕጎስን ከይርኣየ ገለ
ሕጎስ የለን ሰይጣን ከይትኣለ
ክንደይ ጂግና ኣብ ጸልማት እንዳብለ
መመንኪሉ ቁጽርና እንዳጕደለ
ብተንኮሉ ህዝቢ እንዳጸለለ
ኩሉ ስርሓቱ ሕልኽልኽ ዝበለ
ሽሕጣን ዝኣመሉ ንኸይልለ
ብሓሶቱ ህዝቢ እናታለለ
ንዝገብሮ ሓቂ እናምሰለ
ኣካቢ መሲሉ እናፈላለ
ንኣና ብዝመስሉ እናሰለለ
ቃልስና የናውሕ እናሓናኾለ
ንዑ ሜላ ንድለ ዝማፅበለ

እቲ ሜላ እንታይ ይመስለኩም
ምኽርኹም ለግሱ ልብኹም ቀሊፅኩም
ዓው ኢልኩም ክሰሱ ከይፈራህኩም
ብሓባር ደው በሉ ምእንቲ መሰልኩም
ሓደ የለን ሃገር ዝኸልኣኩም
ነገር ጠዋውዩ ንዝፅንቅፈኩም
ኣብርሁሉ ቅንፅና ምሓዝኩም
ርእሱ ምስ ኣቕንዐ በቲ ቃልሲ ናትኩም
ከመስግነኩም ኢዩ ዓወት ምስ ለበስኩም

ዓለም ምስ ረብረበ ዝተኸሎ
ከምዚ ናትና ነገር ምስ ተሓናኾሎ
ስርዓት ኣሎ ንኹሉ ዝኽእሎ
ሕጊ እንተሎ ማፅርነት ካኣ ኣሎ
እቲ መሰል'ውን ምስኡ ኢዩ ዘሎ
ንዑ ጥራይ ደብተር ንገንጽሎ
ንሽግር ዝፈትሕ ተጻሒፉ ኣብኡ ኣሎ

ኣይንጨነቕ ጥራይ ነባርሮ
ስርሑ እዚ ጉዳም ንመርምሮ
ኣእምሮ ዝጠዊ ብኾቦሮ
ኣዋጅ ይውጻእ ንሰብ ዝሕርሮ
ሂወት ዝተኸፍሎ ህዝቢ ዝጽዓሮ
ንኹሉ ጌሩዎ ዝሮምሮ
እዚ በዳል ህዝቢ እንታይ ዘይገበሮ

እቲ ፍታሕ ኩሉ ኢዩ ዝደልዮ
ነቲ ዘሎ ሽግር ህዝቢ ኢዩ ዝኣልዮ
ነቲ ዝፈላሊ ጥራይ ነለልዮ
ንታኣከብ ንምከር ኣብ ዘዘለናዮ
እንምሓደረሉ ሕጊ'ውን ነጽርዮ
ንሱ ጥራይ ይኹን ናይ ኩልና ፅዮ

ፍለጡዋ መታለሊት ኢያ ስልጣን
መልሓሳ ምልውዋጥ ምስ ሽሕጣን
እቲ ዝለውሳን እቲ ዝልፅጥጣን
ቃላቱ ናይ መልኣኽ ግብሩ ግን ናይ ሰይጣን
ምስ ትዓዘብክያ ሓሲያን ለዊጣን
ኣብ ዘተ ጸዊፅካ ኣሕልፋ ብቐጣን

ከምኡ ምስ ኮነ ኢዩ ውዑል ተፈሊጡ
ንኡ ንምጽናፅ'ውን ፊርማ ተሸርጢጡ
ኣብ መዝገብ ይጸንሕ ተቐሚጡ
ንሓቀኛ የርትፅ ካብቶም ዝዋጠጡ
ንህዝቢ ይሕግዞም ሓቂ ንኽፈልጡ
እዚ ኢዩ እቲ ሜላ ኣሕዋተይ ንኽትፈልጡ

ክብርን ዝኽርን ንስውኣትና
ዓወት ድማ ነቲ ደም ዝነብፅ ዘሎ ህዝብና

ብበላይ መስፍን

 
BLOG COMMENTS POWERED BY DISQUS
 

Videos

Latest Comments

Announcements