ሰሚዕኩም’ዶ ደሃይ ቴዲ ኣፍሮ

ንዕርድን ቅርሕንትን ነጢሩ ክዘሎ፡

ቴዲ ፒኮሎ -  መጻውቲ ኽደሊ

ጥቓ ካተድራለ እንዳ ፒካዲሊ።

ክንደይ ኣሰተውዒሉ ሰብ ቀደም ዘኪሩ

ካብ’ቶም ደቀ’ስመራ - ናይ’ቶም ዘናብሩ

ናይ ተኽለ ተስፋዝጊ ምስናቱ ጸምቢሩ

ፊዮሪ’ልዒሉ ንፍቕሪ ዘሚሩ

“ከም ድላየይ ኣነ ከም ድላየይ” ኢሉ።

ጓለ’ስመራ ዝብል ቃሉ ዶብ ተሳጊሩ

ናይ ባህሊ- ዲፕሎማሲ ብድፍረት ጀሚሩ።

ዋይ’ዚ ቴዲ ሰዊት - ክንደይ ተዓዲሉ

ኣብ ንኡስ ዕድምኡስ ሽማግለ ኾይኑ።

ብኣዋሳ’ቢሉ ዘልዓላ ፍዮሪ

ኣብ’ቲ ኾብሽታቶ ዘሎ ተቐባሊ

ማይ ጃሕጃሕ ይውሰዳ ነዛ ውልዶ ተኽሊ።

ደጊም ንቀራረብ ክሳብ ስግር መረብ

ኣብ’ቲ ሩባ ሩባ ኢድና ንተሓጸብ

ብቛንቋ ንዛረብ ብባህሊ ንላዘብ

ንሱ’ዩ ጥበብ ዝርከቦ መኽሰብ

ኣብ’ዛ ዓለም መርከብ።

ስለ’ዚ’ምበኣርከስ ከነዋህልል ስንቂ

ይሸፈን’ቲ መድፍዕ ትከደን’ታ ታንኪ

ሰላም የድሊ’ሎ ብለወጢ ብዕርቂ።

እንዳ ዝናን ባህታን ዘበት ከይልወጡ

ዝበሉ ይበሉ!

ንቛንቋ ንባህሊ እብረ ንግበረሉ

ዘይተጻረ’ንተሎ ጽባሕ ነርክበሉ

ቀደም’ውን ተ’ኾነ ንሱ’ይኮነን ኔሩ

ስልጣን’ዩ ዓቢዱ - ሰይጣን’ዩ ፈስዩሉ

ዘርኣየ ኣመሉ።

ዳንኤል ተስፋዮውሃንስ።

(01-19-2012)