ግንቦት 24ን፡ ናይ መጀመርያ ብስራትኪስ ጥዑም ኔሩ ኩሉ ኣኽቢሩኪ

ደሓር ግን ኣይግድን መልክዕኪ ቀይርኪ።

ናይ ሃገርኩም ጉዳይ ኣይምልከተኩምን'ዩ ተባሂሉ

ብኣወጅ ካብ ንግዛእ ዳርጋ 20 ዓመት ኮይኑ።

ንኣሽቱ ቆልዑት ኣብ ጽርግያ ኩዕሶ ክጻወቱ

ጎል'ያ ኣይኮነትን ክብሉ ክካትዑ፡

"ከም ሕጊ ሻዕብያ'ባ ብርሳስ ኣይትጽሓፎ!!" በለ ሓዲኦም ጉድ ሰሚዐ

ቦኽሪ እዝነይ'ዩ ኔሩ ገሪሙኒ ንበይነይ ስሒቐ።

ዝበዝሑ ጀብሃ ሻዕብያስ ንዝዓበየ ዕላማ'ዮም ተቓሊሶም

ሒደት ጉሓሉ'ዮም መቃልስቶም ጨፍሊቖም ክሒዶም

ንዙፋኖም ክብሉ ኣርሲሖሞ ዝፈሰሰ ንጹህ ደም።

ጋዜጣታት ተዓጽየን፡ ሰብ ጠፊኡ፡ ኣረጊት ተደፊሩ ተኣሲሩ

ኩሉ ገቢቶሞ፡ ሓሶት ከይተረፈ ተሓጺቡ ከም ዜና ቀሪቡ

ኤሪቲቪ ያኢስ ንሓቂ'ያ ተገልግል ተባሂሉ።

ቋንቁኦም ጥውይዋይ: ፍርዶም ሓንካስ

ንጅግና ከዳዕ ኢሎሞ፡ ንፍልጠት፡ ንትምህርቲ ብላሽ፡፡

ሰብ ይመስሉ ክዳን ምስ ለበሱ

ባንዴራ ተጎልቢቦም ሃገር ዝሕሽሹ።

ልቢ ደሪቑ፡ መዓንጣ ረቒቑ

ምሁር ብድሌቱ ክድንቁር መሪጹ።

  ኩሉ ባጀላታቱ ሒዙ ኣብ እግሪ ዓዋሉ ወዲቑ ሰጊዱ

  ከም ማንም መሃይም "ዝነገሰ ንጉሰይ" እናበለ ግዒሩ፡ ኣዅዲዱ

  ተኣምር ከገብር ዝኽእል ሓንጎል፡ ጭቃ ተለዊጡ።

ብትዕቢት ዝተላዕጠጠ ስሱዕ ዝብኢ ነጊሱ፡ ጎይታ ድኽነት ጎይታ ጥሜት

ስድራቤት፡ ሃይማኖት፡ ዕድመ፡ ፍልጠት፡ ዘየኽብር ግናይ ክፉእ ትምኒት።

   ካብ ኣፍ ህዝቡ መንዚዑ ንእርይራይ ብረት ዘዕጥቕ

   ብቐራን መልሓስ "ህዝብና'ዩ ሃብትና" እናበለ መንእሰይ ዝቐዝፍ።

ትምህርቲ ንዝፈቱ ዕድሉ ዓጽይዎ

ንሰራሕተኛ ህዝቢ ባርያ ለዊጥዎ።

   ሃብታም ዝነበረ ኣድክይዎ

   ነቲ ድኻሞ መሊሱ ድሂኽዎ

   ውሻጠ ኣትዩ ቆፎ ሓፋሽ ከይተረፈ ፈቲሽዎ።

ጽፍሪ ሰብ ኣድምዩ ብጽፍረይ ዝብል ሓሳዊ ተጀሃሪ

ኣመል ምስ መግነዝ ኮይንዎ ዘለኣለም ምስ ሰበረ ዝበልዓሉ ጻሕሊ።  
 

ነብስኻ ምኽኣል'ሞ እንታይ ክወጾ፡ ጥዑም ዘረባ

ልሳንን ልቢን ናይ በሃልቱ ግን ምሒለን ከይላዘባ፡፡

      ነብሱ ክኢሉ ዘይፈልጥ ዓለቕቲ

      ሃገር ኣማሲኑ፡ ኣንጉዕ፡ ሕልና ዝመጺ::

      ዱላ ሒዙ፡ ነብስኹም ከኣሉ ኢሉ ይዋእ ክዋራዘ

      ምሉእ ሂወቶም ነብሶም ንዝኸኣሉ እናዘመተ።

ኤርትራ "ነጻ" ምስ ተባህለት ብገዛእ ዉሉዳ ተረጊጻ

ሕልሚ ከይተረፈት ኣስመራ ከይዳ ሞይታ።

   ተስፋ ናይ ኣፍሪቃ ከም ዘይተባህለት ተቖጽያ ብዕሸላ

   ዓቕሚ ዘለዎ ንስደት ኣምሪሑ መን ደኣ'ዩ ክኣልያ፡ ክርከባ

   ኤርትራ ጉድ ረኺባ፡ ሃገር ተሓሽሻ።

እንታይ ደኣ ኾይነ'የ ገሪሙኒ ክንድ’ዚ ተጋግየ

ምስ ኣርባዕተ ምልዮን፡ ናይ ሓሶት "ሓደ ልቢ" ኮይነ፡

   ኣነንድ'የ ሓወይ እናጠፍኤ እንታይ ገደሰኒ ዝበልኩ

   ኣነኮ'የ ስድራ ቤት ተበቲና፡ ሓፍተይ ክትድፈር ኣፈይ ዝለጎምኩ

   ሬሳታት ረጊጾም ዙፋኖት ከጣጥሑ እናረኣኹ ኣነ'የ ዘጣቓዕኩ

   ናይ ማይ ሓባር ስንኩላት ክርሸኑ፡ ሓንቲ'ኳ ዘይበልኩ

   እወ ኣነ! ሕሱር ጣዖት ዘምለኽኩ።

ግንቦት 24ን ገጽኪ ኣብርህዮ

ነዚ ጸበባ'ስከ ንዓመታ ኣርህውዮ።

      ኣነስ ሓንቲ መዓልቲ'የ ዝፈልጦ የብለይን

      በሪሁ ጸልሚቱ ኣይግድሰንን'ዩ ዉን

      መዓልቲ ናጽነት መዓልቲ ባርነት ኢልኩምኒ ኣይዓጅበንን

      ከምቶም ዝረሳዕኩሞም እሱራትኩም ዝቖርር ዝቖስል ነብሲ የብለይን።

      ንስኻ ግዳ ናብ ልብኻ ዘይትምለስ

      ጣዕሳ ዋጋ'ይብሉን፡ ቁምነገር መሪጽካ ተበገስ

      ብናይ ትማሊ ጸሓይ፡ ናይ ሎሚ ሕጽቦ መዓስ ይነቅጽ።

      እዚ ኹሉ ክፉእ እናረኣኻ ዓገብ ዘይምባልካስ ኣይግድን

      አረ ጽባሕከ እንታይ'ኻ ክትገብር?

      ኣነ ከም ዝርእዮስ ኣባኻ'ዩ'ቲ ሽግር።

      እስከ ሓደራኻ ነቲ መስትያት ጽ!ቡ!ቕ ጌርካ ጠምቶ

      ካብ ነብስኻ ደገ ወጺእካ’ስከ ንኹሉ ባህርያትካ ምዘኖ፡ ገምቶ

      ናይ ሓንጎል እሱር ኣይትኹን፡ ይኣኽለካ ሎምስ፡ ለብም ድኣ ግደፎ።

      ርሑቕ መገሻ ብሓንቲ ስጉምቲ'ዩ ዝጅመር

      ሓደ በል ክልተ በል ኣርባዕተ ምልዮን ደምር

      ዓገብ በል፡ እምቢ በል ቀልጥፍ!! ሎሚ ጀምር

      ሕጊ ነጊሱ፡ ንስኻ ክበርሞ፡ ኣነ'ዉን ክኸብር

      ንሱ ምስኮነ ጥራሕ'የ፡ ኣነ ግንቦት 24፡ እወ'ይለ ዝምስክር።

ተወልደ እስጢፋኖስ