ህዝብና ይጸንት ኣሎ በብሓንቲ
ገለ ኣብ ዶብ ገለ ኣብ ማእሰርቲ
ገለ ብጥይት ገለ ብማሕነቕቲ
ገለ ብጨወይቲ ገለ ብመረዝቲ

ከይራዳድኡ ሓው ምስ ሓውቲ
ስኒትና ዘሪጎምዎ ተበለጽቲ
ባህልና ኣጥፊኦምዎ እዞም ዘረግቲ
ርህራሄ ዘይብሎም ንኹሉ ጨከንቲ
 
ሃገር ኣጽኒቱዋ ብሓለዋ ሰውራ
ገለ ሞይታ ገሊኣ ደንቊራ
ገለ ትጠፍእ ዝገበረት ጌራ
ገለ ትመናጭት ምስኣቶም ሓቢራ
እዚ ኮይኑ ፍርኡ እቲ ሰውራ
 
ሃገር ሓሚሶምዋ ሰብ ኣበሳ
ምስሎም ናይ ሰብ ፍጥረቶም እንስሳ
ብጾቶም ዝበልዑ ከም ናይ ባሕሪ ዓሳ
የሕዝነኒ ኤረ ከምዚ ተኻሒሳ
 
እታ ድልድል ከይትስበረና
ቀጥ ኢልና ንሓዞ ንቓልስና    
ፍትሕስ ከነምጻ ኢና ብዘበልና ኣቢልና
 
ዘይትጽመሞ’ዩ ሃገር ኩነታቱ
ኣንጻር ምልኪ ግዳ ዘይትኸቱ
ዓድና ክኸውን ዓዲ ዋናታቱ
ህዝብና ኮሪዑ ክወፍር ክኣቱ

ዝሓርስ ሓሪሱ ከእቱ ምህርቱ
ዝነግድ ነጊዱ ብድሓን ክኣቱ
ጊዜ ምስ ሓለፈ ከይትሕተቱ
ህዝብኹም ንምድሓን ኩልኹም ክተቱ
ኩሉ ክነብረላ ሃገር በበታ ክእለቱ
 
ምእንቲ ህዝብና ነሕስባ ርእስና
ኣፍና ይኹን ክንዲ ኣፍ ህዝብና
ብልሓት ንፍጠር ምእንቲ ሃገርና
ከይትተርፍ ሃገርና ኮይና ዑና
 
ብየማን ብጸጋም ምኽሪ ተቐበሉ
ጽልኢ ወጊድኩም ፍቕሪ ኣማዕብሉ
ብልሓት ተማሃሩ ሃገር ንኽትተኽሉ
ጸገም ሰጊሩ ኢዩ ዓለምና ማዕቢሉ
 
ክብርን ዝኽርን ንስውኣትና
ዓወት ካኣ ነቲ ደም ዝበብዕ ዘሎ ህዝብና