{autoremote linkfromdisplay="true" shuffle="false" autostart="true" width="270" height="20"}http://blip.tv/file/get/Asmarino-OgbaiAntiHarnet442.mp3{/autoremote}

ኣንቲ ሓርነት! መዋእል ብሂግና ክንነብር ምሳኺ
ኣብ ኣፍሪቃስ እምበር- ብዓንተቦ ኢና ፈሊጥና ክብርኺ
ግድነት ኮይኑ- ጽዋእ ህይወት ከፊልና ክንረክብ ንዓኺ፣
ተመስገን ሎምስ መጺእክልና- ኢልና’ውን ተፈሲህና ርኢና ባናኺ።
ተተስፊና- ብብርሃንኪ  ማሚቝና ክነብር
ብናይ ምሕሳብ ሓርነት መሰል - ክንዝቲ  ዝደምዓና ብሓባር
ብፍትሒ ብሰላም ክንመላለስ- ኣብ ውሽጥን ወጻእን ሃገር፤
ደቅና ክንሕብሕቦም ብፍቕሪ ኣብ ሑቕፌና
ብጽኑዕ ስነ-ምግባርን ትምህርትን- ከነዕብዮም ኰስኲስና
ምእንቲ ኪዀኑ ሓበን ንወለዶም- ተስፋ ንሃገርና
ሓረግ ወለዶታት ከይብተኽ- ናይዛ ሓላል መሬት ዓደቦና
ዕንባባኦም ክንርኢ ክንዕልል- ቅዱስ ሕልሚ ናይ ህይወትና፣
ተዳሊና ኣንጊህና ንስራሕ ክንትስእ- ክንስልጥን ከም ዓለምና
ኣይተጸበናክን ግን! ልዳት ረጊጽኪ ብኣጋ ክትመልቍና።

ሓርነት፥
እወ! ምእንታይሲ ኣዚዩ ገዚፍ መስዋእቲ ከፊልኩም
ኣብ ምሕላወይ ግን ኣይነሳሕኩምን- ካብ ንጕሆ ዘንጊዕኩም፣
እግሩ ከይኣተወ- ከብቅዕ ብግልጺ ብደዐ ነጊሩኩም
ግዲ ከም ዘይብሉ- ብዛዕባ ትምኒት ሓርነትኩም
ልቦና ኣጥፊእኩም- እምብዛ ተገሪህኩም
ንርትዒ ብምዕባስ- ስምዒት ኣንጊስኩም።

ጕንዲ ነገር ረሲዕኩም- ጥሒልኩም ኣብ ጫሌዳ ዘረባ
እሾኽ እናበልሐ- እናረአኹም ኪረግፍ ዕንባባ
ትም ኰይና መልስኹም- እናተፈትለልኩም ሕሱም ጸበባ
ንኽብርኹም እናቐንጠጠ- ኣብ ዝገብሮ ኣኼባ
ከንቱ ኲናት ወሊዑ- ንወላዲት ዝሰበረ ልባ
ንብደዐን ኣነነትን መላኺ: ቈጺርኩሞ ሓልዮት- ዘይብሉ ዓጸባ።

ኣብ ዝባንኩም ዘሎ መላኺ- ኣይኰነን መንድዓት
ሓዚልኩሞ ኢኹም- ከምዘይሓልፍ ተገዚእኩም ንፍርሃት
ይኸውን ከኣ ኣሎ- ንዕኡ ሰናዩ ንዓኻትኩም ጥፍኣት
ስዉኣት ኣይኰኑን- ህሉዋት ኢኹም ዘድልየኩም ፍትሓት።

ስኒት ዘይብሉ ህዝቢ- ኣይኣቱን’ዩ ቤቱ
ፍቕሩ’ዩ ዝዓጅበኒ- ኣይኰነን መስዋእቱ
ክስቈሮ ምተገብአ- ከስተንትን: ክዝክር ትምኒቱ
ብዘይ ብርሃነይ ከንቱ ምዃኑ- ትርጉም ናይ ህይወቱ
ዘንጊዑኒ ከም ዝመልቝ- ሰም እንተ በላ የዒንቱ።

ሽምዓታት ወሊዕካ- መዓልቲ ስውኣት ምዝካር
ዓመት መጸ ኣብ መዓልቲ ናጽነት- ምስ ከበሮ ምዕንዳር
ትርጉም የብሉን ብዘይ ስኒት- ናይ ሓድሕድ ምክብባር
ግዝኣተ-ሕጊ የድሊ- ፍትሒ’ውን ምዝውታር።

ንግዲ ምስ ሸቐጥ: ናይ ሕርሻ ውሕልነት
ትምህርቲ ሕጊ ምስ ቁጠባ: ጥበብ መሃንድስነት
ልቦና ተመክሮ ህይወት- ምስ ኣኽሊል ሊቅነት
እንታይ ፋይዳ ኣሎዎ- ብዘይ ብርሃን ሓርነት።

ቅኑዕ ተግባር የለን- ብዘይ መትከላዊ እምነት
ቀጣን ሓቂ ኢያ ዘይትኽማህ- ናይ ፍትሒ መቐነት
ንጹር ዕላማ’ዩ- ናይ ጽንዓት ውሕስነት
መሰረት ምዕባለ- ማሕበራዊ ውህደት።

ርሻናት እንተ ተሃንጹ- መታካእታ ኣግነት
መንገድታት እንተ ተዘርግሑ- ክሳብ ትሕቲ መሬት
ግቡእ ጻማ ዘይተኸፍለሎምዶ ከይኰኑ- ፍረ ወፍሪ ባርነት
እንታይ ኢዩ ጥቕሞም- ብዘይ ጸጋ ሓርነት፤
ሓቀኛ ስልጣኔስ ምዕባለ’ዩ- ብኹሉ መዳያዊ ህይወት
መሰል ኩሉ ምኽባር’ዩ- ዘጽንዕ ሓድነት
ኣብ ውሽጥኹም ምስ ዝህሉ’የ- ትስሕቁ ናይ ብኡነት።

ጻህያይ ብውልዶኡ- እሾኽ ከየብቈለ
ተመን ብንኡሱ- ፍጹም ከይገበለ
ድንቍርና ኪመሓው- ሱር ከይተኸለ
መንግስቲ ኪቕየር- ሃገር ከይበደለ
መለለዪ ህዝቢ’ዩ- ብታሪኽ ዝበሰለ።

እዚ ኣብ ስደት ዝርከብ- መብዛሕትኡ ኤርትራዊ ህዝቢ
ብፍላይ መንእሰይ- ምስ ሞት ተፋጢጡ: ዘምለጠ ኢሉ እምቢ
ምሁር ኣካል እውን ኣሎ- ምምራሕ ዝነፈገ: ዝሓንገደ ካብ ልቢ
ኪመሃር እንተ ዝደሊ- የለን ካብ ህሉው ኩነታት ዝዓቢ
ንምንታይ’ዩ- ሃገር እናጠፍአት ምቅላስ ዝኣቢ
ንያቱ ዲዩ ተረሚሱ- ወይስ ተሳኢኑዎ ቐልቢ?

ብሰሪ ኲናትን መስዋእትን- ዘይሰሰነ ቍጽርኹም
ተወሳኺ መርገም ኰይኑ- ስኒት ክርሕቕ ካብ መንጎኹም
ናይ ምሕሳብ ሓርነት- መሰል ተኸልኪልኩም
ኣብ ዕዳጋ ወሪዱ- መሬት ኣቦታትኩም
ህዝቢ ኤርትራ- እንታይ ኢዩ ወሪዱኩም?

ክትነብዕ ዝተፈርደት- ወላድ-መኻን ሓንቲ’ያ ኣዴኹም
ንቃለሰልኪ ኣለና ክትብሉዋ- ኣብ ስደት ተዓቚብኩም
ስቓያ ኣብ ክንዲ ትኣልዩ- ሓደ ቅልጽም ኴንኩም
ተስፋኣ ካብ ተሕርሩ- ሓድነት ስኢንኩም
ውድባት ከተራብሑ- እናተፈንጨልኩም
ከቢድ ህየንታ ኣሎዎ- ትም ምባል ምሓሸኩም።

ሓርነት ኣብ ምድላይ- ኪህሉ ኣይምተገብአን ዝፈላልየኩም
ሓሳብኩም ስለ ዘይቐንዐ’ዩ- ዘይነጽሀ ሕልናኹም
መን ቀዲሙ ሓዘ ንመምበር ስልጣን’ዩ- እቲ ሕቡእ ጸገምኩም
ናይ ጽባሕ ስልጣን ከተቋምቱ- ሎሚ ንሓድነት ኣዘኽቲምኩም
ካብ ጸልማት ጸቢብ ሕልሚ- መዋጽኦ ይፍጠረልኩም።

ኣቃሊሑ እምበር ኔሩ’ዩ ዓለም- ኣንፈት ብሩህ መጻኢኹም
ምቕሉላት ኵኑ: ትምክሕቲ’ዩ ሃሲዩኩም
ድሕሬኹም ዝነበሩ- ኪሓልፉ ቅድሜኹም
ካብ ሕሉፍ ተመሃሩ- ህነጹ ሓድነትኩም
ኣለልዩኒ! ሓርነት’የ ትንፋስ ናይ ህይወትኩም
ኣብ ልብኹም ኣስፍሩኒ- ዋልታኹም ገቲርኩም።

ኣብ ኲናት ኣንጻር ባዕዲ ዝተሓጽረ ኣይኹን ስኒትኩም
ምክብባር ሓድሕዳዊ መሰል- ትፈልፍል ኣብ እንዳኹም
ሰላም ኣኻዕብቱ ክትሃንጹ ሃገርኩም
ዘንጊ ፍትሒ ትኸሉ- ብረት ምልዓል ይኣኽለኩም።

ኣብ እዋን ሰላም ተርእዩዎ ስኒት’ዩ- ዝገልጽ መንነትኩም
ጥምየት ዘይኰነ- ጽጋብ ምኽኣል’ዩ ሓያል ብድሆኹም
ካብዚ ንላዕሊ’ሞ- እንታይ ክነግረኩም
ንብርሃነይ ክትጽገዉስ- ልቦና ይዓድልኩም።

ኤርትራውያን ኣሓትን ኣሕዋትን፥
ናይ ሓርነት ተግሳጽ- ምስ ምዕዶኣ ካብ ሰማዕና
ንሓቂ ንጠምታ- መፍትሕ ናይ ድሕነትና
ንኣርዑት ባዕዲ ክንሰብር- ከቶ ዘይሰልከና
ንምንታይ ንማስን- ንጠፍእ ድሕሪ ናጽነትና?!

ኣእምሮኡ ዝሰሓተ- ብጥልመት ስዉኣት
ሃገር ብምልእታ- ቀዪሩዋ ጸልማት
ህዝቢ እናተሳቐየ- ብሓለንጊ ጥምየት
ከይሓነኸ ይብል- ‘የለን ዝዳረገና ብዝገበርናዮ ዕብየት’፤
ደም ንጹሃት ዘፍሰሰ- ገበናዊ ሓጢኣት
ኑዛዜ ዘይሓጽቦ- ዘይርከቦ ስርየት
የዕበድብዶ ኣሎ- ናይ ግዳ`ያት ኣውያት
ኪደዓዓስ ይፍትን- ብናይ ዓጀውጀው ቃላት
ኪእለ ኣሎዎ- ከየስዓበ ፍጹም ጥፍኣት።

ርኢናያ ዝኣክል! ኢሳያስ ዝሓለማ ሓዳስ ኤርትራ
ሃገር ብምልእታ ኰይና- ቤት ማእሰርቲ ዓባይ ናዅራ
ረመጽን እሾኽን ክትረግጻ- ዘይትከኣል ብሰላም ክትነብራ
ዕሸላት ደቃ ብዓጸቦ ኪሳቐዩ- ትሓድር ሸፋቱ ኣድሪራ
እልፊ ኣእላፋት ብሉጻት ደቃ- ከም ቈጽሊ የሕሪራ
ብዘይካ ህውከት- ዘይብላዓ ናይ ሰላም እንጌራ
ንጐረባብታ ተርብሕ ደቃ ኣባሪራ።
ወናኒኣ ህያው ዜጋ- ናብ ንብረት ዝቐየረት
ነታ ጅግና ወላዲት ጀጋኑ- ብዘሕዝን ዘድፈረት
ወጋሕታኣ ኰይኑ ጸልማት- ንያት ህዝባ  ዘዕበረት
ገለ ደኾን እቲ ብሂል ናይ ‘ዝነገሰ ንጉስና’- ሃሊዩዎ ታሪኻዊ ሰረት
ካብኡ ተረፈስ እዚኣ ኣይኰነትን ኤርትራ - እታ ወናኒት ምዕሩግ ባህሊ ዝነበረት
ኣብ 61 ብረት ኣልዒላ: ብመስዋእቲ ናጽነታ ዘበረት።

እነመኽንየሉ ባዕዲ እምበር የለን ሎምስ- ነሰክሞ ነቲ ጠንቂ ናይ ሕሰምና
ካባና’ዩ ኹሉ: ንመላኺ ሃገር ዝራሕረሐ- ውሽጣዊ ስንፍናና፤
ሕማቕ ቅንኢ: ተንኰል: ስስዐ: ኣነነት: እንታይ ገዲሱኒ- ዝብሉ መርዚ ድንቍርና
ፍጹም ዝዘንጋዕናዮም ድኽመታት’ዮም- ብመግዛእቲ ተበዲልና
እቲ ዝዓበየ ብድሆ ህዝቢ ዓለም’ዩ- ገና ዘይሓለፍናዮ ፈተና
ጸጋ ሓርነት ከኣ ኣይርከብን’ዩ- ንዕኡ ከይበዳህና
ሃገር ከነድሕን ዘይከኣል’ዩ- እንተ ዘይጀሚርናዮ ካብ ገዛእ ርእስና
ግድን ቅድመ ኩነት’ዩ- ካብ ድሑር ሕማማት ከነንጽህ ሕልናና
ብሓባር ንውጻእ ካብ ጸልማት ልግሚ- ንበራበር: ንሓዋሩ ከይጠፍእ ወለዶና።

ይኣክል ስቓይን ውርደትን ንበል- ሓደ ሓያል ማዕበል ድምጺ ንኹን
ግዝኣት-ሕጊ ነንግስ- ሰላም ምስ ራህዋ ምእንቲ ኪሰፍን፤
ስለዚ ንዛተ: ንላዘብ- ግዜ ከይሃድመና ንግበር ነቲ ቕኑዕ 
ቋንቋናን ባህልናን ነኽብር- መሰረት መንነትና ምእንቲ ኪጸንዕ
ሕድሪ ስዉኣትና ይከሓስ እንቲ ብሓቂ ክንኰርዕ።

ክቡር ዘለዓለማዊ ዝኽሪ ንስዉኣትና!
ሓርነት: ራህዋን ሰላምን ንውጹዕ ህዝቢ ኤርትራ!!

ዑቝባይ ገብረመድህን
20 ሰነ: 2009